Татарстан Социаль фонды махсус хәрби операциядә катнашучылар һәм аларның гаилә әгъзаларына төрле ярдәм чаралары күрсәтә. Мисал өчен, сугыш хәрәкәте ветераннары ай саен өстәмә рәвештә 3,8 мең сум акча ала. Бу хакта фондның матбугат хезмәтендә хәбәр иттеләр.
«Россия Социаль фонды бүлегеннән мондый түләүне төбәктә 30,5 меңнән артык кеше ала (әлбәттә, аларның барысы да махсус операциядә катнашкан кеше түгел – Т-и иск.). Аны алу өчен гаризаны Дәүләт хезмәтләре порталында яки күп функцияле үзәктә тапшырырга мөмкин. Гариза тапшырганнан соң хәрби хәрәкәтләр ветераны Социаль фондка таныклыкның төп нөсхәсен яки аның нотариус раслаган күчермәсен бирергә тиеш», – дип хәбәр итте Россия Социаль фондының ТР буенча бүлеге идарәчесе Эдуард Вафин.
Моннан тыш, махсус операциядә катнашучы яки чакырылыш буенча хезмәт итүче хәрбинең баласы булса, андыйларга 15,5 мең сум күләмендә айлык пособие каралган. Мобилизацияләнүчеләрнең көмәнле хатыннарына, йөклелек срогы 180 көннән дә кимрәк булмаса, 36,2 мең сум күләмендә бер тапкыр акча түләнә.
Тагын бер ярдәм чарасы – махсус хәрби операциядә катнашучыларның гаиләләренә бердәм пособие, ул аларга ташламалы шартларда билгеләнә.
Хәрби бәрелешләрдә яралану нәтиҗәсендә инвалид дип табылган кешеләргә 1 мең сум күләмендә өстәмә айлык матди ярдәм каралган. Чакырылыш буенча хәрби бурычын үтәгән вакытта һәлак булган яки хәрби хезмәттән кайтканнан соң, анда алган яраларыннан үлгән солдатларның балаларына 2,8 мең сум күләмендә айлык пособие билгеләнә.
Хәрби бурычын үтәгән вакытта һәлак булган солдатларның тол хатыннары фатирга түләү чыгымнарына бәйле рәвештә компенсация түләүләре алу хокукына ия. Аның күләме айлык коммуналь түләүләр, шул исәптән стационар телефон урнаштыру чыгымнарының 60 процентын тәшкил итә. Хәрби бурычын үтәгән вакытта һәлак булган солдатларның гаилә әгъзаларына шәхси торак йортны ремонтлау өчен акча түләнергә мөмкин.
Украинада махсус хәрби операция 2022 елның 24 февраленнән бирле үткәрелә. РФ Президенты Владимир Путин күп тапкырлар белдергәнчә, махсус операция тиешле максатларга ирешкәнче дәвам итәчәк.
Россия Кораллы Көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны аша күбрәк белергә мөмкин.
