Аның кабатланмас, үзенчәлекле, моңлы тавышы күптән инде халык күңелен яулап алды. Гомерен сәхнәгә багышлаган җырчы, Татарстанның халык артисты Шамил Әхмәтҗановка 80 яшь тулды. Җырчының репертуары татар композиторларының классик әсәрләренә дә, милли җәүһәрләргә әйләнгән халык көйләренә дә бай. Җырчы үзенең юбилеен туган җирендә – исеме җырларга кергән Арча төбәгендә билгеләп үтте.
Бу көннәрдә үзенең олы юбилеен билгеләп үтүче Татарстанның халык артисты Шамил Әхмәтҗанов Арча районының Курса Почмак авылыннан. Шуңа күрә дә ул туган ягында җае чыккан саен булырга торыша. Үзенең 80 яшьлек юбилей бәйрәмен дә ул туган ягында тамаша кылырга уйлады. Әлбәттә, туган як тамашачысы каршында чыгыш ясау үзе зур җавплылык сорый. Әмма, Шамил Сабир улының һәр сүзе уйланылган, төгәл мәгънә, репертуар һәм кичәнең барышы да йөз тапкыр тикшерелгән, язып ныгытылган. Әйтеп үтәргә кирәк, радиофондта, Шамил Әхмәтҗанов башкаруында 150 артык җыр саклана. Алар арасында саллы-саллы татар халык җырлары, күренекле композиторларыбызның күркәм әсәрләре, бәет-мөнәҗәтләр, төрки халыклары телендәге язмалары да шактый.
Ярты гасырга якын җыр сәнгатенә тугры хезмәт иткән зур талант, татар сәхнәсенең тәҗрибәле “мэтр”ы Шамил абый, Татарстанның халык артисты Шамил Сабир улы Әхмәтҗанов бүген дә сафта, ул сәхнәдә җырчы, мәктәп- көллиятләрдә, Татарстан дәүләт җыр һәм бию ансамбленең аерым җырчыларына тавыш куючы укытучы – педагог, хатынына яраткан ир, балаларына хөрмәтле әти, оныкларына дәү әти.
Юбилей кичәсе бер сулышта узды. Сания Әхмәтҗанованың “Язмышлар такыясы” дип исемләнгән китабындагы “Арча поезды” шигырьләр циклында авылдашы Шамил Әхмәтҗановка багышланган “Сорнай моңы илчесе” шигыре бар. Шигырьгә кереш сүз итеп: “Дөнья дәрәҗәсендә югары бәяләнерлек җырлар тудырган маэстро, авылдашым – Татарстанның халык артисты Шамил Әхмәтҗановка багышлыйм”, – дип язган горурланып.
Халкыбыз горурлыгына әверелгән олуг артистыбызга сәламәт акыл, иҗади уңышлар теләп калабыз.
