Татарстан Дәүләт телерадиокомпаниясе Русфонд хәйрия җәмгыяте белән берлектә, авыру балаларга ярдәм итү буенча уртак проектны дәвам итәләр. Без сезнең белән узган атнада София Судниковага булыштык. Барыгызга да зур рәхмәт! .Бүген исә Сарман районыннан унбер яшьлек Алия Хафизованың авыру тарихы. Кыз кан тамырларын зарарлаучы сирәк очрый торган иммун авыруыннан интегә. Тиз ару-талу, кулларда һәм аякларда авырту сизү, тән температурасы күтәрелү – болар Алия авыруының кайбер билгеләре генә. Табиблар кан тамырларын зарарлый торган сирәк иммун авыру диагнозын куйганнар.
Рәзилә Хафизова Алиянең әнисе: «Авыру үсеш алмасын өчен, дару кулланырга кирәк. Кайберәүләре ташламалы рецепт буенча бирелә, ә көнгә ике тапкыр эчәргә тиешле дару ташламалы исемлектә юк. Аны табып, сатып сатып алу кыенга төшә.»
Алия гади мәктәп укучысы була. Тик бер ел элек салкын тиеп авырый башлый. Теләсә нинди вирус эләктерсә, хәле кискен авырая. Өй шартларында укуга күчә. Ә күптән түгел кыз авыр формада коронавирус белән дә авырган. Ике атна хастаханәдә дәваланган. Шул вакыттан бирле әти-әнисе дуслары янына йөрүне чикләгән.
Алия Хафизова: «Мин бишенче сыйныфта өйдә генә укыйм.. Тизрәк тереләсем, дусларым һәм сыйныфташларым белән мәктәпкә йөрисем килә.»
Элек Алия сәнгать мәктәбенә йөргән, төрле олимпиадаларда катнашкан. Дусларын сагына, аралашасы килә. Табиблар кызның хәле яхшыруга өметләнә. Моның өчен кыйммәтле препарат кирәк.
Зөлфия Саликова табиб-педиатр: «Без үз көчебез белән генә кызны кирәкле дарулар белән тәэмин итә алмыйбыз. Ай саен ике төргәк дару кирәк. Әлеге препаратны сатып алырга ярдәм итүләрен сорар идек.»
Хәзер Алиягә бер еллык дару кирәк. Ул 312 мең сумга төшәчәк. Гаиләдә андый акча юк. Без сезнең белән бергәләп ярдәм итә алабыз, хөрмәтле телевизор караучылар! Моның өчен 5542 номерына ДЕТИ сүзе белән смс җибәрә аласыз. Бер хәбәрнең бәясе-75 сум. Күбрәк өлеш кертергә теләүчеләргә тулырак мәгълүмат безнең телерадиокомпания һәм Русфонд сайтларында.
Ралина Абрамова, Татарстан яңалыклары.
