«Торак һәм шәһәр мохите» илкүләм проекты нигезендә башкалабызның «Салават Күпере» торак комплексында социаль ипотека буенча яңа йорт сафка басты. Тантаналы шартларда яңа фатир хуҗаларына ачкычлар тапшырылды. Торак комплексында быел шулай ук Мәдәни үзәк, мәктәп һәм өч балалар бакчасы төзү күздә тотыла. Тулырак хәбәрчебез репортажында.
Паллиатив ярдәм күрсәтү буенча яшь табиб Рушана Рафикова республика клиник хастаханәсенә эшләргә Ульяновскийдан бер ел элек килә. Аңа ярты миллион сумлык грант алуда катнашырга тәкъдим иткәннәр. Ярты елдан соң Рушана яңа фатир ачкычын алды.
Яшь табиб Рушана Рафикова:»Мин эшкә урнашуга хастаханә җитәкчеләре шундый тәкъдим ясады. Чөнки чит шәһәрдән күчеп килдем, торагым да, гаиләм дә юк. Бу ярдәм бик вакытлы булып чыкты.»
Илкүләм проект кысаларында яңа йорттан грант алган табибларга, бюджет өлкәсендә эшләүчеләргә, авария хәлендәге торактан күченүчеләргә һәм Бөек Ватан сугышы ветераннарына торак бирелде.
Александр Иванов отставкадагы полковник. Хатыны Нина белән аларга да фатир ачкычы бирелде. Гаризаны узган елның апрелендә үк тапшырганнар һәм фатирны бушлай алганнар.
Александр Иванов: «Бөек җиңү бәйрәме алдыннан, Татарстан Хөкүмәтеннән, республика җитәкчесеннән шундый бүләк алуыма мин бик шат.»
Барлык фатирларда уңайлы шартлар тудырылган сантехника, су һәм электр энергиясе счетчиклары, янгын сигнализациясе датчиклары, шулай ук җылылык регуляторлары белән җиһазландырылган.
ТР Президенты каршындагы Дәүләт торак Фондының Казан бүлеге җитәкчесе Алексей Гобәйдуллин: «Без барлык тәкъдимнәрне дә исәпкә алдык, бу йортта җилдән саклану, диварларны җылыту системасы кулланыла, бу җылылыкны экономияләүгә китерәчәк.»
Торак комплексында 2020 елда Мәдәни үзәк, мәктәп һәм өч балалар бакчасы төзү күздә тотыла.
Екатерина Васильева, Владимир Юрков.
