Сабабаш авылы халкының шатлыгы зурдан. Яңа ел каникулларында биредә модульле фельдшер-акушерлык пункты ачылды. Ул «Сәламәтлек саклау» милли проекты кысаларында төзелгән. Тантанада безнең иҗат төркеме дә катнашты.
“Сәламәтлек-зур байлык”, ди халкыбыз. Ә шул саулык сагында торучы фельдшер-акушерлык пункты ачылу –авыл халкы өчен олы шатлык. Яңа бина барлык заманча таләпләргә туры китереп эшләнгән. ФАП видеокүзәтү җайланмасы белән дә җиһазландырылган.Уңайлы шартларда халыкны кабул итү, төрле медицина процедуралары үткәрергә мөмкин хәзер. Бүгенге көндә 429 кеше яшәүче Сабабаш авылына медицина ярдәмен Гөлнәзирә Сабирҗанова күрсәтә. Ул-сәламәтлек сагында 36 елдан артык хезмәт куючы тәҗрибәле фельдшер.
Азнакай,Казан төзүчеләренең уртак тырышлыгы белән сафка баскан сәламәтлек пункты авылның иң уңайлы җирендә урнашкан. Уңган егетләр эшне тиз тоткан. Июль ахырында башланган төзелеш эшләре декабрь азагына тәмамланган.
Яңа ел бәйрәмнәрендә бинаны ачу авыл халкы өчен, чын мәгънәсендә, бәйрәмгә әверелде.Казанда пылау пеште, самавырда чәй кайнады,табада коймак чыжлады. Шатлыкларын бүлешергә килгән район җитәкчесен сабабашлылар ипи-тоз,якты йөз белән каршыладылар.
Сабабаш авылы халкына беренче ярдәм күрсәтүнең сыйфатын арттыруга мөмкинлек бирүче яңа бина районыбызда унөченчесе. Медицина хезмәткәрләренең эш шартларын яхшыртырга да мөмкинлек тудырган пункт авыл халкына озак хезмәт итсен иде.
