Саба районы Кави Байкиев исемендәге Икшермә кадет мәктәп-интернатының 45 укучысы кадетлар сафына басты. Укучылар туган илне , Ватанны сакларга әзерләнергә ант иттеләр. Мәктәп өчен әһәмиятле тантанада мәктәп коллективы , хакимият вәкилләре, укучыларның әти-әниләре катнашты.
Ел саен кадетлар саны арта бара. Бу юлы да аларның сафларын әлеге мактаулы статуска лаек булырга теләкләре булган укучылар тулыландырды. Кадет формасы да үзләренә килешеп тора. Бәйрәм байракларны кертү һәм дәүләт гимннарын башкарудан башланды. Саба районы башлыгы Рәис Миннеханов кадетлар сафына кабул ителүчеләргә таныклыклар, кадет званиеләре дә тапшырды. Бу көнгә алар төгәл итеп хәрби команда бирергә , стройда дөрес итеп йөрергә өйрәнгәннәр. Икшермә кадет мәктәбендә тирә-күрше районнардан гына түгел , Казан шәһәреннән , Нократ Аланыннан , Башкортсаннан килеп белем алучылар да күп.
Ильмирның әнисе Гөлүсә ханым үзе балачакта хәрби булырга , шул юнәлештә укырга хыялланган. Ләкин тормышка ашыра алмаган. Улының биредә белем алуы белән ул чын күңелдән горурлана.
Кадетлар — илнең өметле киләчәге, булачак ил сакчылары. Хәзергә кадетларның төп бурычлары – уку, белем алу.Аларның күбесе үзләренең киләчәкләрен хәрби хезмәткә багышлауны максат итеп куя. Мәктәптә профориентация юнәлеше буенча да бик ныклы эш алып баралар.
Әти-әниләр дә балаларының биредә укуларыннан, биредэге тәрбия һәм уку йортындагы шартлардан бик канәгать.
Хәрби тәрбия, мөстәкыйль тормыш, туган йортны, әти-әнине атнага бер тапкыр гына күрү егет-кызларны чын мәгънәсендә чыныктыра, катлаулы тормыш юлына әзерли.
Кадет анты кабул итү бик зур вакыйга. Хәзер укучыларның төп бурычы – әлеге антка тугры калу.
Эльза Әхмәтҗанова, Татарстан яңалыклары, Саба районы