Бер гасырлык юбилей! Саба районы Сатыш урта мәктәбе үзенең 100 еллыгын каршы алды. Чараның күңелле мизгелләре безнең алдагы материалда.Килгән кунаклар иң элек мәктәптә булып, аның тарихын хәтердә яңартты. Махсус әзерләнгән бай күргәзмә, экспозицияләр белән танышты.
Сатыш тирән тарихлы, хезмәт сөючән кешеләргә, зыялы шәхесләргә бай авыл. Тирә– юньгә белем нуры таратучы мәдрәсәсе белән танылган авыл элек – электән белемле һәм мәдәниятле булган. Бирегә төрле төбәкләрдән шәкертләр килеп укый. Укучылар камил рәвештә гарәп телен белгәннәр. Төрле елларда 400 ләп шәкерт белем алганлыгы билгеле.
1923нче елда Шомырбаш авылыннан килгән укытучы — Григорий Петрович Сатыш авылының иң беренче мәктәбенә нигез сала. Мәктәп дөньяви белем биргән, уку-язу гарәп алфавиты нигезендә барган. Шушы көннән башлап, бер гасырлык тарихында мәктәп, хәтта авыр сугыш елларында да, ишекләрен япмаган.100 ел гомер эчендә авылда ничә буын алышынган, күпме бала белем һәм тәрбия алган, күпме мөгаллим бу балаларга белем биргән. 2010 нчы елның 22 мартында Сатыш урта мәктәбенә РФ һәм Татарстанның атказанган укытучысы Шамил Зиннур улы Зиннуров исеме бирелде.
Мәктәптә 135 укучыга 26 мөгаллим белем бирә. Белем йорты заман таләпләренә бар яктан туры килә. Аның иркен спортзалы, спорт мәйданчыгы, зур ашханәсе, балык уңайлыклары булган класс-кабинетлары, көнкүреш хезмәт бүлмәсе, актлар залы, остаханә, проект эшчәнлеге бүлмәсе һәм китапханәсе бар. Бүгенге бәйрәмгә мәктәпне төрле елларда тәмамлаган 150 ләп кеше чакыру кабул итеп алган.
Кунакларны иң нык җәлеп иткәне мәктәптә кулланылучы заманча технологияләр булды. Үткән еллар сагындырса да, яңа заман күпкә мавыктыргыч.
Сатыш урта мәктәбе бүгенге көндә Республика күләмендә зур уңышларга ирешеп, илгә-көнгә кирәкле шәхесләр тәрбияләвен дәвам итә. Үткәне бай, бүгенгесе матур,киләчәге өметле булсын иде.
Эльза Әхмәтҗанова, Гөлназ Вахитова, Ирек Солтанов, Татарстан яңалыклары, Саба районы.
