Бу көннәрдә Татарстанның һәм Каракалпакстанның халык артисты Вафирә Гыйззәтуллинаның эшләрен, ул кылган гамәлләрне хуплаучылар аның җырларын, аһәңнәрен үз иткәннәр җырчыны күңелләре аша үткәреп тагын бер кат искә алды. Җитди сәбәп тә бар Татарстан урамы 7нче йортта Вафирә Гыйззәтуллина хөрмәтенә истәлек тактасы куелды. Чарадан махсус репортаж.
Вафирә Гыйззәтуллина җырлаганча Ком бураны ук булмаса байрак җилфердәрлек җилле иде ул көнне. Ургылып аккан җыр җил ярсуыннан да, машина, юлдагы-ыгы зыгы гөрелтесеннән дә көчлерәк. Очраклы узып баручылар җырчының тавышына сокланып, туктап кала, кызыксына. Ә белгәннәре искә алуларына шатланып рәхмәтләрен җиткерергә ашкына. 20 ел элек арабыздан фаҗигале рәвештә китеп барган Вафирә Гыйззәтуллинаны халык таный, халык ярата.
Җырчыны искә алганда күпчелек, тамашачыга таныткан җыры аша хәтерлиләр. Вафирә Гыйззәтуллина дигәч, “Туй җыры”, “Зиләйлүк”ләр арасында “Көзге ачы җилләр” дә, язмышының хәлиткеч җыры “Ком бураны” искә төшә. Әйе, халкына, теленә, тарихына гамле җырчы илдә көрәш барган чакта өйдә утырмады. Мәйданга чыкты.
Әнә нинди итеп мәңгеләштерелгән Вафирә Гыйззәтуллина. Заманында нәкъ Туфан Миңнуллин искәрткәнчә ай сыман уйга, милләт гаменә чумган килеш моңланып утыра.
Искә алу мәрасимен Фердинанд Сәлахов алып барды. Чыгыш ясаучылар җырчының талантын да, ташкынга каршы бара ала торган холкын да искәртте. Истәлек тактасы куюда башлап йөрүчеләргә дә кат-кат рәхмәт сүзләре җиткерелде.
Тавышы белән бөтереп ала, туры сүзе белән егып сала, ярдәме белән тора алмас җиреңнән бастыра торган Вафирә берәү генә иде шул. Аның башкаруында “Туган тел”халкыбызның аягурә басып җырлый торган гимнына әверелеп китте.
Мөршидә Җиһан. Ирек Хәмидуллин. Татарстан яңалыклары .
