Россиядә эшләми торган ял көннәре, май бәйрәмнәрен исәпкә алып, 11-нче майга кадәр озайтылды. 12-нче майдан башлап төбәкләрдә кертелгән чикләүләр исемлегенә этаплап үзгәрешләр кертә башлаячаклар. Бу хакта Россия президенты Владимир Путин, илнең субъектлары җитәкчеләре белән коронавирус инфекциясе таралуга каршы тору мәсьәләләре буенча видеоконференция режимында узган киңәшмәдә белдергән иде. Белгечләр мәгълүматларына караганда, илдә эпидемиянең югары чиге әлегә үтелмәгән. Төрле төбәкләрдә коронавирус таралу белән бәйле вәзгыять төрлечә булганга, субъектлар башлыклары өстәмә вәкаләтләрне саклый һәм кертелгән чикләүләрне гамәлдән чыгару турында карарларны мөстәкыйль кабул итәчәкләр.
Президент Хөкүмәткә, Кулланучылар хокукларын яклау һәм кеше иминлеге өлкәсендә күзәтчелек федераль хезмәтенә Дәүләт Советының эш төркеме белән элемтәдә 12-нче майдан чикләүләр режимнарыннан этаплап чыгуның эзлекле адымнарын билгеләүне йөкләде. Коронавирус белән авыручыларны дәвалау өчен барлык кирәкле җиһазлар булган махсус ятакларны җәелдерүне дәвам итәргә, медицина учреждениеләре өчен шәхси саклану чаралары запасларына мониторинг үткәрергә кирәк. Шулай ук Президент Хөкүмәткә якын арада икътисадка һәм гражданнарга ярдәм итүнең кичектергесез яңа пакетын әзерләргә кушты.
