Татарстанның елдан-ел икътисади яктан үсеше һәм шул ук вакытта яшьләрне патриотик тәрбияләүгә зур игътибар бирүе сөендерә. Татарстан Рәисе Рөстәм Миңнехановның Республика Дәүләт Советына юллаган мөрәҗәгатеннән соң Россия Герое Рәсим Баксиков шундый фикерен әйтте.
«Татарстан Рәисенең юлламасы вакытында мин үз республикам турында бик күп кызыклы сүзләр ишеттем. Һаман да хәйран калып торам әле. Мин хәрби булганга күрә, төбәгебезнең үсешен күзәтергә вакытым аз, мин аны тышкы яктан гына бәяли алам. Икътисади үсештә яңа дәрәҗәләргә чыгуыбызга бик шатмын», — дип билгеләп үтте агентлык әңгәмәдәше.
Ул ассызыклаганча, яшьләрне патриотик тәрбияләү мәсьәләсе Рөстәм Миңнеханов чыгышында төп мәсьәләләрнең берсе булган. Баксиков үзе дә бу эштә ярдәм итәргә тырышуын билгеләп үтте.
