Сак булыгыз, кош гриппы! Республиканың кайбер районнарында авыру очраклары теркәлгән. Мөслим һәм Чүпрәле районнарында кош гриппы диагнозы расланды. Элегрәк кош гриппы чыганагы Буа районында ачыкланган иде. Республика авыл хуҗалыгы һәм азык-төлек министрлыгы, Россельхознадзор һәм Баш ветеринария Идарәсе кош гриппы таралуга юл куймау буенча республика штабы утырышын уздырды. Чарага видеоконференция элемтә режимында республиканың барлык муниципаль районнары да кушылды.
Йогышлы чир таралуның төп сәбәбе — башка төбәкләрдән фермерлар тарафыннан ветеринария документлары булмаган кош-корт кайтару, шулай ук кошларның кыргый су кошлары яши торган табигый сулыкка керүләре. Йогышны бетерү буенча чаралар комплексы үткәрелә. Чирле кошлар юк ителә. Буа районындагы крестьян-фермер хуҗалыгында 920 баш каз һәм 117 баш үрдәк бетерелде.
Габделхак Мотыйгуллин ТР Министрлар Кабинеты каршындагы Ветеринария идарәсе җитәкчесе урынбасары
Татарстанда 18 миллионнан артык кош-корт исәпләнә. Шәхси ярдәмче хуҗалык тотучылар, кошчылык предприятиеләре җитәкчеләре аеруча уяу булырга тиеш. Вирус биналарда, кошчылык фабрикаларында, ишегалларында, тере кош базарларында, башка объектларда зарарсызландырылмаган продуктлар: ит, йомырка, кош мамыгы, каурый, азык, су, кош тизәге, эш кораллары, шулай ук транспорт чаралары һәм хезмәт күрсәтүче персонал аша таралырга мөмкин.
Габделхак Мотыйгуллин ТР Министрлар Кабинеты каршындагы Ветеринария идарәсе җитәкчесе урынбасары
Республика авыл хуҗалыгы министрлыгы, баш ветеринария идарәсе бу мәсьәләне урыннарда аерым контрольгә алырга кушты. Авыл хуҗалыгы һәм азык-төлек министры Марат Җәббаров җитди үтәлергә тиешле профилактик чараларны бәян итте.
