Татарстан елга-күлләрендә «Уылдык чәчү» операциясе дәвам итә. Кагыйдәләрне бозучыларга карата дистәләгән административ беркетмә төзелгән. Дәүләт тыюлыгы инспекторлары, хокук саклау органнары вәкилләре белән бергә, Идел-Чулман бассейны сулыкларын һәм елгаларын тикшерәләр. «Спас» тыюлыгы инспекторлары белән чираттагы рейдка хәбәрчебез дә чыкты.
Апрель азагыннан июнь урталарына кадәр Идел-Чулман бассейны сулыкларында ел саен балык тоту тыела. Нәкъ менә шул вакытта балыклар уылдык чәчә. Кагыйдә бозучыларга штраф яный. Ә бу аеруча саклана торган территория, дәүләт табигый тыюлыгындагы кебек, җинаять җаваплылыгына да тартырга мөмкиннәр.
Хокук сакчыларының беренче хәйләсе тиз арада нәтиҗәсен күрсәтте. Менә бу балык тотарга яратучылар, автомобильдә килеп, аеруча саклана торган территориядә булу режимын бозган. Яр буеннан чыгып китәргә була, ә менә якында гына суга төшерелгән ятмәнең аларныкы түгел икәнлеген дәлилләргә кирәк.
Инспекторлар ятмәләрне күтәреп, анда эләккән чуртан, судак, сазан балыкларын кабат суга җибәрәләр. Бу эшне аларга бу көннәрдә берничә тапкыр башкарырга туры килә.
Ә менә бу ял итүчеләр-кагыйдәләрне бозмыйлар. Ятмә белән балык т отуның законсыз икәнлеген аңлыйлар.
Тикшерү барышында тәртип бозучыларны тоту җиңел түгел. Элегрәк стажлы браконьерларның да үз саклык чаралары булган. Әйтик, төнлә авылда фонарьлар яна икән, димәк, ятмәләрне суга – янәшәдә контролерлар бар. Ә хәзерге кәрәзле элемтә вакытында, браконьерларның эзенә төшү тагын да авыррак. Тәҗрибәле инспекторларның да сыналган үз хәйләләре бар.
Махсус чор өчен кагыйдәләр катгый. Дәүләт күзәтүе катерларыннан башка, суда моторлы көймәләрдә йөзү тыелган. Балыкны яр буенда кармакка гына тотарга рөхсәт ителә. Ятмә, башка җайланмаларны куллану катгый тыела.
Тыюлыкларда исә су буена хәтта автомобильдә дә килергә ярамый. Тик күпләр кагыйдәләр турында белми, яки белмәмешкә салышалар.
Биоресурслар буенча Дәүләт комитеты хезмәткәрләре көн саен диярлек рейдларга чыгалар. Инспекторларның күз уңыннан берни дә читтә калмый.
Май бәйрәмнәрендә генә дә «Спас» тыюлыгында рейд нәтиҗәләре буенча уннарча беркетмә төзелгән, ә моңа кадәр җинаять эшләре дә ачылган.
Республикада «Уылдык чәчү» операциясе 5 июньгә кадәр дәвам итәчәк. Әле шуннан соң да инспекторлар закон бозучыларга каршы көрәшне туктатырга җыенмый.
Дмитрий Второв, Ленар Хәбибуллин.
