Олы яшьтә булсалар да, офтанырга вакытлары юк. 80 яшенә җитеп килүче Римма Кичятова белән Валентина Данилова чаңгыда шуып кайтып киләләр. Берсе яшәгән урамнан урман да ерак түгел генә урнашкан.
Римма Кичятова: “Быел табигатькә әллә нәрсә булды, артык җылы.Чаңгыда 12 генә тапкыр чыктык.70шәр тапкыр йөри идек.”
Быел чаңгыда йөрү мөмкинлеге аз булгач, аларның карашы ишегалдына төбәлгән. Биредә олысыннан алып кечесенә кадәр уңайлы булырга тиеш дип саныйлар.
Римма Кичятова: «Монда балалар мәйданчыгын үзгәртсеннәр иде. Эскәмияләр куеп, өлкәннәргә спорт мәйданчыгы булса да ярап куяр иде. Тренажерлар булса тагын да яхшырак.”
Восстание юл киселеше урамындагы 33 нче йортта да үзгәрешләр көтәләр.
Йортта яшәүчеләр ремонтчылар бригадасының үзләрен читләтеп үтмәвенә өметләнә. Волгоград урамында да шул ук хәл.
Полимер мәдәният йортында узган очрашуда Киров һәм Мәскәү районнары хәкимиятләре вәкилләре, депутатлар катнашты. Биредә йорт яны территорияләрен төзекләндерүгә быел бер миллиард сум тотылачак.
Киров һәм Мәскәү районнары башлыгының беренче урынбасары Наил Минвәлиев: “ Без ишегалларын төзекләндерүгә апрельдә тотыначакбыз. Асфальт җәеләчәк. Ә тулаем Киров һәм Мәскәү районнары буенча 114 ишегалдында комплекслы ремонт булачак, ул 183 торак йортны үз эченә ала.”
Татарстан президенты Рөстәм Миңнеханов инициативасы белән башланган Безнең ишегалды республика проектын үтәүгә барлыгы 50 миллиард сум акча бүлеп бирелгән.
ТР Дәүләт Советы депутаты Артур Габделҗанов: “ Без ишегалларын – тротуарларны, юлларны төзекләндерү, яктырту, балалар мәйданчыкларын булдыру белән бәйле соөиаль киеренкелек бетәп дип ышанабыз. Халык башкарган эшләрне лаеклы бәяләр дигән өметтә калабыз”.
Республика буенча якындагы өч елда 7 мең чамасы ишегалдын тәртипкә китерәчәкләр.
Инна Данилова, Сергей Павлухин, Ринат Сәхипгәрәев.
