Татарстанда фермерлар сарык үрчетүне сәнәгать масштабында үстерергә планлаштыралар. Хәзер республикада 300 мең баштан артык мал бар. Ә сарык итенә ихтыяҗ арта бара. Алабуга районы хуҗалыкларының берсендә көрд токымлы сарыклар үрчетүне башлап җибәрергә җыеналар.Эш нинди стадиядә тора? Хәбәрчебез ачыклады.
Татарстан болыннарында-Австралиянең меринос токымлы сарыклары. Аларны асрауга артык зур чыгымнар кирәкми, хуҗасына табышлы. Йоны, ите сыйфаты өчен бәяләнә. Хәзер хуҗалыкта шундый 300 баштан артык сарык бар. Бер ел инде үрчетә башлаганнар.
Хуҗалыкта Иделбай токымлы сарыклар да үрчетәләр. Болар симез көрд токымлы сарыклар. Тере малның авырлыгы 100 килограммга кадәр җитә. Асрарга да җайлы.
Татарстан сарыкларына илнең башка төбәкләре сатып алучылары да күз салды. Башта фермерлар безнең базар ихтыяҗына эшләргә тели. Әле ярты гасыр элек кенә республикада миллион башка якын сарык үрчеткәннәр, хәзер бу сан 3 тапкырга кимрәк. Якындагы бер- ике елда хуҗалыкта терлекләрнең баш санын 2500 меңгә җиткерергә җыеналар.
Фирүзә Насыйрова, Владимир Юрков, Татарстан яңалыклары, Алабуга районы.
