Республика мәктәпләрендә туклану cыйфатын тикшерү эше дәвам итә. Белем учакларында балаларны кабул ителгән норма буенча ашатырга тиешләр. Төп шарт-ризыкның кайнар һәм туклыклы булуы. Әйтик, Буа районының 2 нче номерлы лицеенда бу кагыйдәләр үтәләме? Балалар ризыктан канәгатьме? Хәбәрчебез шуларны белеште.
Тавык ите белән бәрәңге, кәбестә салаты һәм какао — 2нче лицейда белем алучыларның гадәти төшке ашы. Бүген балаларының ничек туклануын карарга Лилия Хисамиева килгән. Биредә аның ике кызы укый. Алар менюга зарланмаса да, кайбер ризыкларны бик өнәп бетермиләр икән.
Хатын-кызларны мәктәп укучылары белән бер өстәл артына утырттылар. Укучылар һәм ата-аналарның төшке ашы бернәрсәсе белән дә аерылмый – шул ук салат, икенче аш һәм эчемлек. Бу ризыкларны мәктәп шеф-повары Алсу Хәсәнова әзерләгән. Лицейны продуктлар белән, районның башка мәктәпләрен кебек үк, «АБК-Пэймэнт» оешмасы тәэмин итә.
Дегустация тәмамлангач ата-аналар беркетмә тутырдылар. Документта мәктәп ашханәсе турында бәяләмә, теләкләр калдырдылар.
2нче лицейда ата-аналар контроле бу елның беренче сентябреннән кертелгән. Хәзерге вакытта биредә 750гә якын бала укый – бу Буа районында иң зур мәктәп.
Һәрбер ата-ана мәктәптә баланың нәрсә белән туклануын белә һәм бәя бирә ала. Аларның ашханәгә килү графигын сыйныф җитәкчеләре төзи. Тыгыз элемтә эшне активрак контрольдә тотарга ярдәм итәчәк.
Алсу Сәмигуллина, Айрат Насруллов. Татарстан яңалыклары
