Кукмара районының Состамак авылында яшәүче Равил Семенов фаҗига булган көнне яхшы хәтерли. Янәшәдәге урманга хатыны белән гөмбә җыярга баралар. Кыр аша узганда үгезләр көтүенә очрыйлар.
Республика клиник хастаханәсе пациенты Равил Семенов: «Анда электр каравылчысы тора, күрше фермерның 40ка якын үгезе шунда йөри. Без бераз гөмбә җыйдык, аннары өйгә кайтырга булдык. Без кайтып барганда кинәт бер үгез миңа һөҗүм итте, сөзде, хәлем бетеп егылдым.»
Равил Семенов аңын югала. Хатыны ярдәм чакыра. Ир район үзәк хастаханәсендә генә аңына килә. Ул могҗиза белән генә исән кала, үгез арка сөяген, кабыргаларын сындырган, үпкәсе кысылган була.
Санавиация чакыртып, ирне республика клиник хастаханәсенә китерәләр. Казанда тиз арада зыян күрүчегә операция ясарга килешәләр. Чөнки Равил Семеновның хәле начарлана бара. Табиблар бер наркоз белән операция ясарга була.
Республика клиник хастаханәсенең 1нче номерлы торакаль хирургия бүлеге мөдире Валерий Матвеев: «Зарарланган үпкәне тегеп, күкрәк читлегенә катлаулы операция ясалды. Кабыргаларын титан пластиналар белән тоташтырдык. Операцияне травмотологлар белән бергәләп ясадык, организмда катлауланулар көчле иде.»
Хәзер ирнең гомеренә куркыныч янамый, хастаханәдән чыгаралар. Табиблар барлык киңәшләрне дә үтәгәндә, Равил Семеновның бер ярым, ике ай ярымнан соң үзен яхшырак хис итәчәгенә өметләнәләр.
Булат Шакиев Дамир Мөхәммәтханов, Татарстан яңалыклары.
