Елга якынча нәтиҗәләрдән күренгәнчә, Татарстанның икътисади күрсәткечләре үсә. Әйтик, тулаем төбәк продукты 2,8 процентка артачак. ТР Финанс министрлыгы, Федераль салым хезмәтенең республика буенча идарәсе һәм Татарстан буенча Федераль казначылык идарәсенең уртак коллегиясендә шундый саннар китерелде.
«Агымдагы катлаулы шартларда без икътисади күрсәткечләрнең үсешен тәэмин итә алдык. Елга нәтиҗәләрне болай бәялибез: тулаем төбәк продукты 4 триллион сум тирәсе тәшкил итәргә тиеш, бу – узган елга карата 102,8 процент. Үсеш булырга тиеш. Төяп җибәрелгән продукция буенча без көткән максат – 4,5 триллион сум, төзелеш эшләренең күләме – 700 миллиард сум тирәсе, үсеш – 14 процент. Иң мөһиме – ел нәтиҗәләре буенча төп капиталга инвестицияләр күләме 1 триллион сум тәшкил итә», — дип белдерде республика Рәисе Рөстәм Миңнеханов.
Бу күрсәткечләргә, нигездә, федераль дәрәҗәдә кабул ителгән ярдәм чаралары нәтиҗәсендә ирешелде, дип искәртте төбәк башлыгы. Хөкүмәт йортында узучы утырышта РФ финанс министры Антон Силуанов, Россия Федераль салым хезмәте башлыгы урынбасары Виктор Бациев һәм Федераль казначылык җитәкчесе Роман Артюхин катнаша.
