Республика президенты Рөстәм Миңнеханов инициативасы белән башланган “Безнең ишегалды” программасы тулы куәтенә гамәлдә. Татарстанда ишегалларын төзекләндерү эшләрен 2024 елга кадәр башкарып чыгу планлаштырыла. Уртак тырышлык матур нәтиҗәләрен дә бирә. Чаллы шәһәренең 27-нче комплекс активистлары «Безнең ишегалды» программасы кабул ителгәнче үк инде, йорт яны территорияләрен төзекләндерүгә керешкәннәр. Ә республика күләмендәге проект гамәлгә кергәннән соң, барысына да эш арткан. Тулырак киләсе материалда.
«Безнең ишегалды» программасы буенча 27 дә 24 а йортта эшләр май аенда ук башланган – төзүчеләр юлны киңәйтә, автомобиль өчен яңа парковка урыннары ясала. Хәзер керү юлларына асфальт җәясе генә калган.
Ә подьезд каршылары әллә кайдан игьтибарны җәлеп итеп, балкып тора. Йортта яшәүчеләр анда төрле чәчәкләр үстерәләр, коймаларны да үзләре тотып алган.
27/24а йортта яшәүче Алинә Бакирова: «әни өч елдан артык инде чәчәкләр үстерә, элек монда шыксыз иде, тирәякны матурлыйсы килде.»
Бу “Безнең ишегалды » программасын тулыландыра гына. Эшчеләр төзекләндерү белән шөгыльләнсә, йортта яшәүчеләр җирдә эшли.
27нче комплекс территориаль иҗтимагый үзидарәсе рәисе Венера Наумкина: «күп кенә подъездларда барысын да, инвалидларга билгеләнгән пандусларны да үзгәртергә туры килде. Чәчәк түтәлләрен ясадылар. Ә “Безнең ишегалды” программасын үтәүгә керешкәч, ярдәмчеләр тагын да артты, һәркем ишегалдын матурларга тырыша.».
Янәшәдә генә балалар өчен уен мәйданчыгы ясала, аны төрле яңа элементлар белән тулыландырачаклар. 27/04 йорт янында моңа кадәр файдаланылмый яткан җир участогында киң парковка урыны булачак. Бардюрлар куялар, җәяүлеләр өчен дә уңайлыклар тудырачаклар.
Шуннан соң эшчеләр 27нче комплексның башка ишегалларын төзекләндерүгә керешәчәк. 27/10 йорты үзенчәлекле санала, анда хәтта подъездлар да декоратив виноград белән бизәлгән, пөхтә клумбалар да күз явын алырлык матур. Биредә шулай ук юлны киңәйтәчәкләр һәм тротуарларны яңартачаклар. Активистлар әнә шулай уртак көч белән үзләренең яшәү урыннарын уңайлы итәргә тырышалар.
