Татарстан Президенты Рөстәм Миңнеханов күрсәтмәсе буенча оештырылган ярдәм Актаныш районы авылларына да килеп җитте. Яңа Әлем авылында яшәүче 28 гаиләгә азык-төлек төргәкләре тапшырылды. Ялгызы гына кызын үстерүче Лилия Зәкиева белән ике бала анасы Ләйсән Хәбирова да ярдәм җыелмасын сөенеп кабул итте. Тулырак киләсе репортажда.
“Ярдәм янәшәдә” республика хәрәкәте аша Актаныш районының 660 гаиләсенә булышлык күрсәтелде. 8 яшьтән зуррак балалы, җан башына гаиләнең уртача кереме яшәү минимумыннан түбәнрәк булган 343 гаилә, әти-әнинең икесенең берсе алимент түләүдән баш тарткан җиде гаилә, опека һәм попечительлек вазыйфаларын үтәүче 24 гаилә, социаль яктан куркыныч биш гаилә, кереме яшәү минимумыннан кимрәк булган 65 яшьтән өлкәнрәк ялгызы гына яшәүчеләр, бүгенге кризистан зыян күргән 52 үзмәшгульлек белән шөгыльләнүче һәм шәхси эшмәкәр республика җитәкчелегенә ихлас рәхмәт сүзләрен әйтә.
Коронавирус авыруына бәйле вәзгыятьтә авыл халкына волонтерлар ярдәм итә. Казаннан азык-төлек ярдәме алып килгән йөк машинасын да махсус киемнәрдән район волонтерлары каршы алды. Беренче көнне башкаладан җибәрелгән ярдәм төргәкләрен “Игелек үзәге” бинасына саклауга куйдылар. Икенче көнне 1200 сумлык 13 төрле ризык салынган тартмалар автобуслар белән авыл җирлекләренә озатылды.
Шулай ук район волонтерлары кибет, даруханәләрдән кирәк-яраклар алып кайтып бирү, ишек алларын җыештыру, бакча казуда да мохтаҗларга булышалар.
Ләйсән Газизова.
