Татарстан Президенты Рөстәм Миңнеханов, парламентарийлар узган атнада республика авыл хуҗалыгы һәм азык-төлек министрлыгының йомгаклау коллегиясе утырышында катнаштылар. «Казан Экспо» коллегиясенә кадәр Россия агросәнәгать казанышларының 4 нче махсус күргәзмәсе ачылды. Парламент хәбәрләре турында тулырак минем коллегам Алия Галиуллина сөйләр.
Россиянең 33 төбәгеннән 200 дән артык компания үз технологияләрен, техникасын, продуктларын һәм, әлбәттә инде, яңалыкларын күрсәтте. Күргәзмә павильоннарында комбайннар, чәчү комплекслары, теләсә кайсы басуга керергә сәләтле заманча сиптергечләр, ашлама, орлыклар, фермер продукциясе тәкъдим ителде. Фермерлар һәм шәхси ярдәмче хуҗалыклар узган ел 11 миллиард сумлык продукция җитештергән. Аерым блокта фән һәм мәгариф казанышлары күрсәтелде. Цифрлаштыру елында аграр университет үзенең уникаль Агробиотехнопаркын тәкъдим итте. Шунда ук югары уку йорты белән зур авыл хуҗалыгы компаниясе арасында студентларның практика узуы турында килешүгә кул куелды.
Күргәзмәне Рөстәм Миңнеханов һәм Россия Федерациясе авыл хуҗалыгы министрының беренче урынбасары Оксана Лут карап чыктылар. Коллегия утырышында агросәнәгать өлкәсендә эшләүче Дәүләт Советы депутатлары да актив катнашты. Профильле комитет җитәкчесе Азат Хамаев фикеренчә, авыл хуҗалыгы продуктлары җитештерү буенча лидерлык позицияләрендә калу, технологияләрдән калышмас өчен, мондый күргәзмәләр бик файдалы.
Узган елгы гаять коры табигый шартларга карамастан, авыл хуҗалыгында җитештерүдә тотрыклылык саклап калынды. Быел да тармакны зур сынаулар көтә. Ашлама, ягулык-майлау материалларына бәяләр күтәрелде. Аграрийларга көчләрне бергә туплау мөһим. Тагын бер проблема-авыл халкының хезмәт хакы дәрәҗәсе түбән. Республика буенча уртача күрсәткечтән 40 процентка кимрәк булган районнар да бар. Президент авыл эшчәннәренә хезмәтләре өчен рәхмәтен җиткерде.
Шулай ук Рөстәм Миңнеханов авыл хуҗалыгында иминиятләштерү буенча бурычлар куйды. Әлегә җирләрнең сигез проценты гына иминиятләштерелгән. Бу бик аз. Җиргә ашлама кертүне дә нәтиҗәле итү зарур. Фермерларга ярдәм итү дә игътибар үзәгендә.. Президент фикеренчә, биредә Татарстан кулланучылар берлегенә зур эш йөкләнергә тиеш.
…
Татарстан Дәүләт Советы рәисе Фәрит Мөхәммәтшин узган атнада Россия делегациясе составында Душанбедә булды. Анда «Таҗикстан – төбәкара хезмәттәшлек мөмкинлеге» дигән Парламентара форум узды.
Парламентарийлар Муниципаль Совет сессиясендә катнашты. Ә зур концерт залында Ватанны саклаучылар көне уңаеннан тантана узды.
