Татарстан Дәүләт Советы Рәисе Фәрит Мөхәммәтшин Россия Закон чыгаручылар советы президиумында катнашты. Ул видеоэлемтә режимында узды.
Сүз гражданнарга социаль һәм медицина хезмәтләре күрсәтү, шулай ук коронавирус йогышы таралу шартларында үзәктән читтә урнашкан районнарга йөкләр китерүне оештыру турында барды. Утырышны совет рәистәшләре урынбасарлары-Дәүләт Думасы вице-спикеры Ирина Яровая, Федерация Советы Рәисенең беренче урынбасары Андрей Яцкин үткәрде.
….
Ә Дәүләт Советы Президиумы көзге сессиянең финал утырышы көнен билгеләде. Ул бу атнада җомга көнне, 24 декабрьдә уза.
Парламентарийлар гамәлдәге Җир кодексына”, «Җирле үзидарә турында» законга төзәтмәләр кертергә, закон проектлары белән эшләү, төбәк һәм чит ил парламентлары белән хезмәттәшлек турында фикер алышырга, шулай ук берничә федераль закон проектын карарга ниятли. Фәрит Мөхәммәтшин сессиядә узып баручы парламент елына башлангыч нәтиҗәләр ясарга планлаштыра
СНХ Фәрит Мөхәммәтшин Татарстан Республикасы Дәүләт Советы рәисе
….
Дәүләт Советы утырышына парламент комитетлары да әзерләнде. Аерым алганда, мәдәният өчен кадрлар әзерләү мәсьәләләре, киләсе елга закон проектлары белән эшләү планы, шулай ук Россия төбәкләре парламентлары белән хезмәттәшлек йомгаклары турында сөйләштеләр.
Мәгариф, мәдәният, фән һәм милли мәсьәләләр комитеты утырышында мәдәният тармагы өчен кадрлар потенциалын үстерү турында сүз барды.
Хәзер республикада 173 музей, 18 театр, 19 концерт оешмасы, 2 филармония, 2 цирк, мең ярым китапханә һәм ике мең чамасы клуб эшли. Мәдәният учреждениеләрендә 22 меңнән артык кеше эшли. Хезмәткәрләрнең һәр икенчесе югары белемле. Тармак хезмәткәрләренең квалификациясен күтәрү мөһим. Бу хакта Татарстанның мәдәният министры Ирада Әюпова сөйләде.
Депутатлар билгеләп үткәнчә, мәгариф оешмаларында практик юнәлешле проектларны, шул исәптән эш бирүчеләр заказы буенча эшли алырлык укытучылар-практиклар җитми.
Тагын бер мөһим мәсьәлә – мәдәният өлкәсенә яшь белгечләрне җәлеп итү. Тармак оешмаларында ел саен 25 тән 40 яшькә кадәрге хезмәткәрләр саны кими. Авыл җирлегендә бу мәсьәлә аеруча кискен тора.
…
Республика районнарында муниципаль Советларның финал сессияләре уза, аларда халык ышанычлылары ел нәтиҗәләренә башлангыч йомгак ясый. Утырышларда Дәүләт Советы депутатлары да катнаша. Парламентның Законлылык һәм хокук тәртибе комитеты җитәкчесе Шакир Яһүдин Чүпрәле муниципаль Советы сессиясендә булды, ә утырыштан соң парламентарий район үзәге мәктәпләрендә укучыларны тукландыруның ничек куелуы белән танышты.
…..
Узган атна сәяси һәм иҗтимагый вакыйгаларга бай булды. Фәрит Мөхәммәтшин Казахстан Генераль консулын республика Бәйсезлегенең 30 еллыгы белән котлады, «Ел инженеры» конкурсында җиңүчеләргә бүләкләр тапшырды, волонтерлар белән аралашты, шулай ук «Татарстан-Яңа гасыр»республика хәрәкәте Югары Советының йомгаклау утырышын уздырды.
