Республикада авылда хезмәт активлыгын арттыру буенча зона семинарлары башланды. Аларны Татарстан Дәүләт Советы рәисе Фәрит Мөхәммәтшин үткәрә. Мондый очрашулар узган атнада Байлар Сабасында һәм Кама Тамагында узды.
Иң яхшы тәҗрибәне үзләштерү өчен аны үз күзләрең белән күрергә кирәк. Семинарда катнашучылар шулай эшләделәр дә. «Иген» авыл хуҗалыгы кулланучылар кооперативы мөгезле эре терлекләргә азык җитештерү өчен оештырылган. Узган ел откан грант акчасына терлек азыгы җитештерү өчен яңа җиһазлар монтажланган. Азыкны кооператив әгъзалары да, шәхси хуҗалыклар да сатып ала. Сөт җитештерүне арттырганнар. Ә кооператив узган ел 2 миллион сумнан артык акча эшләгән.
Агробизнесның башка юнәлешләрендә дә яхшы үрнәкләр аз түгел. Шәхси ярдәмче хуҗалыкларда мал, кош ите, сөт продуктлары, ит ярымфабрикатлары, металл эшләнмәләре, агачтан сувенирлар да җитештерәләр. Барысын да парламент рәисенә, авыл хуҗалыгы һәм азык-төлек министрына күрсәттеләр.
Барлык мөмкинлекләр дә тудырылган – Марат Җаббаров семинарда катнашучыларга көтүне яңартуга субсидияләр бирелүен, мини-фермалар төзүгә, кулланучылар кооперативларына грант ярдәме бирелүен искәртте. Моннан дөрес файдалана белергә генә кирәк.
Фәрит Мөхәммәтшин, чыннан да, мөмкинлекләр елдан – ел арта бара, дип саный. Ярдәмнең ахыргы максаты-азык-төлек куркынычсызлыгын тәэмин итү генә түгел, ә авыл тормышын саклау да.
Иң яхшы җирлекләр һәм аларның җитәкчеләре лаеклы бүләкләр алды. Форсаттан файдаланып, җирлек башлыклары, фермерлар һәм шәхси ярдәмче хуҗалыклар вәкилләре Саба районын якыннанрак белде. Алар җирле индустриаль паркта, спорт мәктәбендә, Сатыш авылының музей-мәдрәсәсендә булды.
….
Хәзер Россия Дәүләт Думасында Татарстаннан сайланган депутатлар эшчәнлеге турында. Тиздән язгы сессия һәм парламентның түбән палатасының 7 нче чакырылышы эшен тәмамлый. Һәр халык сайлаучысы үз юнәлешендә, шулай ук республикада сайлаучылар белән очрашуларда актив. Бүген парламентарийлар Айрат Фәррахов, Ольга Павлова һәм Олег Морозовның кыскача төп эш юнәлешләренә тукталырбыз.
