Республика районнарында муниципаль Совет сессияләре дәвам итә. Халык ышанычлылары башкарылган эшләр турында хисап тота. Дәүләт Советы Рәисе Фәрит Мөхәммәтшин узган атнада Әлмәттә, Бөгелмәдә, Мөслимдә һәм Яшел Үзәндә булды. Җыелышларга кадәр, ул социаль объектларны ачуда катнашты, җитештерү өлкәсендәге яңалыклар белән танышты. Ә депутатларга җирле икьтисадның ничек үсүе, республика агросәнәгать рейтингында төбәкнең нинди урында торуына кагылган сорауларга җавап бирергә туры килде.
Әлмәттә һәм Бөгелмәдә узган сессияләрдә Фәрит Мөхәммәтшин социаль объектларны ачуда катнашты.
Парламент җитәкчесенә нефть сәнәгате өчен җиһазлар җитештерә торган предприятиене тәкъдим иттеләр. Узган ел нәтиҗәләре буенча республика рейтингында район 26нчы урыннан 23нче урынга күтәрелгән. Медицина хезмәте күрсәтү темасын да читләтеп үтмәделәр.
Район үзәгенең 300 еллыгы, Бөтенроссия сабантуе уздырылды, максатчан программаларны үтәүдә актив катнаштылар.Мөслим район Советы сессиясендә парламент рәисе төзекләндерелгән балалар сәнгать мәктәбендә, чәчү комплекслары җитештерү буенча республикадагы иң зур заводта булды.
Балалар сәнгать мәктәбе капиталь ремонттан соң ачылды. Кыллы һәм халык уен кораллары белән җиһазландырылган, вокал, театр сәнгате бүлекләре эшли. Мөслимнең сәләтле балалары тагын үзләренең талантларын күрсәтергә әзер.
Фәрит Мөхәммәтшинны балалар сәнгать мәктәбе генә түгел, ә «Агромастер» җитештерү компаниясенең масштабы да гаҗәпләндерде. Элеккеге авыл хуҗалыгы техникасы мәйданнарында чәчү комплекслары, культиваторлар, тәгәрмәчле тракторлар җитештерү буенча заманча завод эшли. Европадагы конкурентларыннан калышмас өчен, яңа җиһазлар, роботлаштырылган эретеп ябыштыру комплектларын кулланалар. Продукцияне республикадан читтә дә, якын чит илләрдә дә саталар.
Узган ел район өчен Мөслимнең 300 еллыгын һәм
Бөтенроссия авыл Сабантуен үткәрү истәлекле булды. Сабантуенда төрле төбәкләрдән 35 меңнән артык кунак кабул иткәннәр. Эш йомгаклары, киләчәккә планнар турында сессиядә фикер алыштылар. Сәнәгать һәм агросәнәгать муниципалитет икътисадының нигезен тәшкил итә. Авыл хуҗалыгында җитештерү буенча район республика рейтингында 14 нче урында.
Утырышта иң яхшы агросәнәгать һәм социаль өлкә хезмәтчәннәренә югары исемнәр, тармак бүләкләре тапшырылды.
Яшел Үзәндә шәһәрнең киләчәге-яшьләр кулында, дип саныйлар, үсеп килүче буынга барлык шартларны тудыралар. «ПОРТ» яшьләр үзәге – яшьләрнең иң яраткан урыннарының берсе. Капиталь ремонттан соң, монда секцияләр һәм түгәрәкләр, уку залы булган китапханә, социаль проектлар инкубаторы эшли. Инглиз телен студентлар да, яшь әниләр дә өйрәнә.
Фәрит Мөхәммәтшин барысын да карады. Медиа-үзәк, табигый фәннәрне өйрәнү түгәрәкләре, сәламәтләндерү төркемнәре, репетицияләр өчен заллар – һәркем үзен күрсәтә яки үз талантын үстерә ала.
Яшел Үзәндәге мәдәни үсеш үзәге — әлегә төзелеш стадиясендә. Төзелешнең кызган чагы. Муниципаль Совет сессиясендә район икътисадын, илкүләм проектларда һәм республика президенты программаларында катнашуны җентекләп тикшерделәр.
Бу-зур сәнәгать үзәге. Горький исемендәге заводта 9 судно төзелгән, а
сыекландырылган газда эшләүче пассажирлар суднолары да төзелә. Серго исемедәге һәм машина төзелеше заводлары уңышлы эшли.
Биредә индустриаль парклар, сәнәгать мәйданчыклары эшли. Резидентлар исемлеге артып тора. Фәрит Мөхәммәтшин дөрес юлны сайлауларын билгеләп үтте, депутатларны кешеләр белән ешрак аралашырга өндәде.
…
Муниципаль Совет сессияләре узган атнада республиканың башка районнарында да узды, Фәрит Мөхәммәтшин шулай ук республика Волейбол федерациясе Президиумы утырышын үткәрде, ә «Мәрхәмәт — Милосердие» хатын-кызлар депутатлар берләшмәсе парламентарийлары дискуссия мәйданчыгында эшләде, анда ятим балаларны һәм ата-ана тәрбиясеннән мәхрүм калган балаларны яклау өлкәсендә дәүләт сәясәте турында фикер алыштылар.
