Узган атнаның төп вакыйгасы – Татарстанның Беренче Президенты, республиканың Дәүләт Киңәшчесе Минтимер Шәрип улы Шәймиевнең 85 яшьлек юбилеен билгеләп үтү булды.
Аны ил җитәкчеләре, халыкара сәясәтчеләр, шулай ук меңләгән гади кешеләр котлады. Татарстан Президенты Рөстәм Миңнеханов үзенең котлавында болай дип билгеләп үтте:
«Сезнең уңышның нигезе – сәяси ихтыяр, җитәкче таланты, фикердәшләр командасын бер тирәгә туплау. Шунысы куанычлы, сез республиканың иҗтимагый-сәяси тормышында актив катнашуыгызны дәвам итәсез, шул ук вакытта ачык һәм ярдәмчел кеше булып каласыз.”
Татарстанның Беренче Президенты юбилее алдыннан республика Дәүләт Советы Рәисе Фәрит Мөхәммәтшин Минтимер Шәймиев белән эшләгән елларын искә төшерде, түгәрәк дата белән котлады.
Республикада узган елгы эш нәтиҗәләренә йомгак ясау дәвам итә. Цифрлы трансформация, елга – күл ярларын ныгыту, полигоннарны рекультивацияләүне тәмамлау. Шушы һәм башка көнүзәк темалар Экология һәм табигый байлыклар министрлыгының йомгаклау коллегиясендә яңгырады. Анда Дәүләт Советы Рәисе Фәрит Мөхәммәтшин катнашты.
Узган елны Балтач май-сөт комбинаты табигатькә зур зыян салган. Предприятие чистартылмаган суны җирле елгага агызган. Экологлар фикеренчә, килгән зыян 6 миллион сумнан да ким түгел. Хәзер эш Татарстан буенча Тикшерү Комитетында карала. Экология министрлыгы коллегиясендә шушы һәм башка закон бозу очраклары турында сүз барды.
Халыкны сыйфатлы эчә торган су белән тәэмин итү – элеккечә үк, якын арадагы төп бурычларның берсе. Өстәвенә, республиканың төче җир асты суларының шактый запаслары бар.
Безнең төп су артериясенә илтә торган, пычрак суларның өлешен киметү буенча гаять зур эш башкарылды. Шул исәптән эчәргә яраклы суның сыйфаты яхшырды. Гомумән алганда, Татарстан территориясендә үзән экологиясе яхшырды. Экология, хезмәткәрләрнең һәм кешеләрнең яшәеше турында уйларга кирәк. Без бу эшне 2022 елда үз алдыбызда бурыч итеп куябыз.
Фәрит Мөхәммәтшин министрлык алдына бурычлар куйды, экологик законнарның үтәлешенә аерым игътибар бирергә кушты. Күзәтчелек органнары белән берлектә барлык закон бозуларга да вакытында чик куелырга тиеш.
Татарстан «Экология» илкүләм проектында актив катнаша. Экология министры Александр Шадриков сүзләренә караганда, әйләнә-тирә мохитне саклауда «чиста ил» федераль проекты Иделне чистарту һәм урманнарны савыктыруга сизелерлек ярдәм иткән. Быел Самосырово полигонын рекультивацияләүне төгәлләргә, Кама Тамагында ярларны ныгытырга, суднолар керү өчен Болгар янында култыкны тирәнәйтергә кирәк булачак. Экология активистларына башкарылган эшләре өчен рәхмәт белдерделәр. Быел экологик тармакны цифрлы трансформацияләү төбәкнең экологик куркынычсызлыгын тәэмин итәчәк, дип ассызыклады министр.
