2024 елның 3 сентябреннән мөселман календаренең өченче ае – Рабигыл әүвәл ае башланды. Әлеге ай халыкта Мәүлид дип йөртелә һәм Мәүлид бәйрәмнәре уздырыла. Апанай мәчете уздырган бәйрәмне хәбәрчебез Мөршидә Җиһан да күреп кайтты.
Мәчет ишегалдында әйтелгән салаваттан күңелләргә нур иңә. Заманында халык телендә Байлар мәчете дип йөртелгән Апанай иман йорты ачылганнан бирле мөэмин–мөселманнар өчен рухи үзәк булып саналган.
Апанай мәчете каршында дини–милли йолалар сагында торучы махсус остазбикә –абыстайлар да үз эшчәнлеген алып бара.
Апанай мәчет һәм мәдрәсәсендә нинди генә чара үткәрсәләр дә, мөнәҗәтчеләр чыгыш әзерли, кул эшләре күргәзмәсе оештырыла, шул исәптән Мәүлет көнендә дә. Бу күркәм эштә волонтерлар да ярдәм итә.
“Мәүлид уку – бик яхшы һәм файдалы Ислам гадәте. Аңарда – мөэминнәр арасындагы аралашу, аларның иманы өчен ышандыргыч дәрес, кешеләр йөрәгендә Аллаһка һәм Аның соңгы илчесе Мөхәммәд салләллаһу галәйһи вә сәлләмгә карата мәхәббәт уяту дип белдерде Мәүлет бәйрәмен оештыручы Нияз хәзрәт Сабиров.
Мөршидә Җиһан, Ленар Хәбибуллин. Татарстан яңалыклары.
