Мәктәп елларыннан ук әдәбият-сәнгать белән кызыксынган, үзешчән сәхнәләрдә төрле тамашаларда актив катнашкан Хәлим Җәләй, 1961 елда Казанда театр училищесы ачылгач, бернинди икеләнүсез укырга керә. Училищены тәмамлагач аны Галиәсгар Камал исемендәге Татар дәүләт академия театрына актер итеп эшкә алалар. Инде менә 55 ел сәхнәдә. Күптән түгел «Намус һәм тугрылык» номинациясе буенча Тантана республика театр премиясе бирелү дә фидакарь хезмәтенә хөрмәт билгесе. Ярты гасырдан артык гомерен сәнгатькә багышлаган артистның яңа гына иҗат кичәсе булып узды. Аны хәбәрчебез Мөршидә Җиһан күреп кайтты.
Берүзе сәхнә тотучы галиҗәнәп артист! Еллар аны үзгәртмәгән. Бары чәчләргә генә кырау төшкән. Үз исемен афшаларга гына түгел, ә халкы йөрәгенә Хәлим Җәләй дип язган талантлы артист ул.
Тын да алмый тамашачы шигырь тыңлый. Тукай шигырләрен. Хәлим абыйны бер башласа тиз генә туктатам димә. Талант бит дәүләт премиясе биреп кенә артмый . Ул премиясез дә Тукай иҗатын, Шүрәлесенә кадәр яттан белә.
Хәлим Җәләйнең иҗат кичәсе дә нәкъ үзенчә шигъри рухта үткәрелде. Хәтта Татарстан президенты исеменнән чыгыш ясаучы рәсми вәкилләренең дә котлавы кәгазьгә карамыйча йөрәктән әйтелде.
Сөйкемле сөяге барлыгын да, язам дисә каләме, уйным дисә һәвакыт роле бар дип тә искәртте иҗат кичәсендә чыгыш ясаучылар . Ә якташлары авылыбызга асфальт җәйдерүдә башлап йөргән Олы Солтаныбызының солтаны ул дип Хәлим абыйга гомер буе рәхмәтле булуларын җиткерде.
Олы Солтанның солтаннары Камал театрында икәү. Алар икесе дә Балык Бистәсе районыннан, авылдашлар, хезмәттәшләр дә, ә дуслык ныклыгы ярты гасырдан артык гомер белән сыналган. Артист булу өстәвенә Хәлим Җәләй бик күп студентларның остазы да. «Эшкә киттем мин», — дип өйдән бик зур кеше булып чыгып китәм дип үз һөнәрен никадәр яратуын аңлаткан бер әңгәмәсендә Хәлим абый. Яраткан эшенә мөмкин кадәр озак йөрергә язсын.
Мөршидә Җиһан, Дамир Мөхәммәтханов. Татарстан яңалыклары.
