Нурлат шәһәрендә «Спорт » паркын реконструкцияләү тәмамланып килә. Тиздән биредә актив ял итү өчен яңа мөмкинлекләрне сынап карарга мөмкин булачак. Бу бер үк вакытта памп-трек та, батутлы зона да, кече архитектура формалары булган ял итү урыны да ул. Төзекләндерелеп беткәч, парк нинди булачак? Нурлаттагы коллегаларыбыз әзерләгән репортажда.
Кечкенә нурлатлыларның спорт паркында яраткан зонасы бар инде. Җирдән аерылып өскә очарга теләүчеләр шулкадәр күп, батутларга хәтта чират та барлыкка килә.
Самирәнең әнисе Гөлия Шаһиәхмәтова: «Без әти-әниләр дә, балалар да шатланып туя алмыйбыз. Парктан ерак тормыйбыз, балалар белән байтак вакытны шунда үткәрәбез. Яңа үзгәрешләргә бик сөенәбез.»
Проект буенча батутлар алтау, әлегә паркны реконструкцияләү дәвам итә, ә киләчәктә яңа уен зоналары барлыкка киләчәк. Мәсәлән, 300 квадрат метрлы памп-трек. Паркташулай ук ял итү урыннары, агачлар күләгәсендә күперле зоналар күп булыр дип вәгъдә итәләр.
Подрядчы оешма прорабы Рамил Нуриәхмәтов: «Спорт паркын төзекләндерүнең икенче этабында күп эшләр эшләнде. Ял итү, җәяү йөрү урыннары булдырылды. 300 метр озынлыкта агач идәннәр җәелде. Шулай ук 600 метр озынлыгында бетон юл ясадык. Эскәмияләр куйдык, таганнар урнаштырдык. Паркны язын-көзен су басмаячак, су канализация люкларына агып төшә.»
Паркны реконструкцияләүгә берничә подрядчы оешма җәлеп ителгән. Шуларның берсе үзәк аркаларда эшләрне тәмамлап килә. Бу декоратив элемент кына түгел-биредә якты таганнар булачак. Алар кичке вакытта да эшләячәк-хәзер биредә тагын 30 ут баганасын урнаштыралар. Су белән тәэмин итү һәм канализация системасы ясала.
Район башкарма комитетының архитектура һәм шәһәр төзелеше бүлеге башлыгы Марсель Гәрәев: «Барлык эшне алдан билгеләнән проект концепциясе буенча үтәдек. График буенча башта төрле үткәргечләрне суздык, ял итү, сәүдә обьектлары урыннарын җиһазладык.»
Спорт паркын реконструкцияләүнең беренче чиратын ике ел элек төгәлләделәр. Октябрь уртасына төзүчеләр икенче чиратны да тәмамларга ниятли.
Гөлназ Хәсәншина, Алмаз Әхмәтҗанов, Татарстан яңалыклары, Нурлат шәһәре.
