Эшеңне яратып башкарганда гына үзеңне тулысынча бәхетле хис итәсең. Һөнәр синең гомерлек юлдашыңа әверелсен өчен, аны дөрес сайлау мөһим. Апас аграр көллияте коллективы да районның мәдәният йортында Апас урта мәктәбе укучылары белән очрашты. Алар укучыларны көллиятнең һөнәри юнәлеше, мөмкинлекләре белән таныштырды. Булачак һөнәр ияләре мастер классларда катнашып, үзләрен сынап карады.
Һәрбер чыгарылыш сыйныф укучысын “Кем булырга?”, “Нинди һөнәр сайларга?” дигән сорау борчый. Көллият коллективының Апас урта мәктәбе укучылары белән оештырган әлеге очрашуы нәкъ менә бу сорауларга җавап табарга ярдәм итә. Апас аграр көллияте – районда һөнәри белем бирүче бердәнбер уку йорты. Аның төп максаты – чын җир улларын, төрле юнәлештәге мактаулы һөнәр ияләрен әзерләү.
Көллияттә быел барлыгы 205 студент белем ала. Алар Апас, Кайбыч, Кама Тамагы, Югары Ослан районнарыннан. Хәтта Казан, Яшел Үзән шәһәрләреннән килгән егет, кызлар да бар. Барысы да нинди дә булса талантка ия. Моның шулай икәнен студентлар сәхнәдә үз чыгышлары белән дәлилләде.
Аграр көллият коллективы район мәдәният йортында күргәзмә дә тәкъдим итте. Биредә Апас мәктәбе укучылары өчен мастер-класслар күрсәтелде.
Бу очрашуда мәктәп укучылары көллияттә үзләштерелә торган һөнәрләр белән кызыксынды. Һәм үзләренә кирәкле мөһим мәгълуматлар алды.
Динә Нәҗметдинова, Гөлназ Вәлиева, Гадиль Галеев, Татарстан яңалыклары, Апас районы.
