Каникуллар файдалы узарга тиеш. Республиканың туристлык үзәкләре, җәмәгать туклануы предприятиеләре кунакларны көн саен төнге 12гә, ә Яңа елны каршылау төнендә 3кә кадәр каршы алырга әзер.
«Татар-информ» мәгълүмат агентлыгында узган матбугат конференциясендә республикада бәйрәм вакытында туризмны оештыру турында сөйләделәр.
Алабуга, Чистай, Зөя һәм башка күп кенә шәһәрләр туристларны каршыларга тулысынча әзер. Арча районында 20 декабрьдә традицион Кыш Бабай һәм Кар Кызы резиденциясе ачыла. Хәзер аның территориясендә яңа «Могҗизалар урманы» да бар. Күп кенә муниципаль районнарда «Ял көннәрендә 1001 ләззәт» программасы эшли башлый – кунакларга кызыклы экскурсияләр тәкъдим ителә. Казанда 18 шугалак, 8 яктыртылган чаңгы трассасы ачылган. Яңа елга багышланган чаралар 18 декабрьдә башлана. Ә шәһәрнең иң зур чыршысы 24 декабрьдә «Казан»гаилә үзәге янында ачыла. Кремль яр буе да бәйрәм кунакларын көтә.
