«Мобиль сайлаучы» механизмы эшенең беренче атнасында гына да аның мөмкинлекләреннән өч мең 726 кеше файдаланды. Бу хакта республика Үзәк сайлау комиссиясе рәисе Андрей Кондратьев сөйләде.
«Мобиль сайлаучы» сервисы — ул теркәлү урыны буенча түгел, ә факттагы тору урыны буенча тавыш бирү мөмкинлеге. Cайлаучы алдан ук тиешле гариза бирсә, уңайлы урында тавыш бирә ала. Моны 11 нче мартка кадәр Дәүләт хезмәтләре федераль порталында, күпфункцияле үзәкнең теләсә кайсы филиалында яки территориаль сайлау комиссиясендә шәхси кабинет аша эшләргә мөмкин. Участок сайлау комиссияләре гаризаларны 6 марттан кабул итә башлый.
