Мидхәт Мөхәррәмов күркәм эшләре, кылган гамәлләре белән киләчәк буыннарга да тирән эз калдырган күренекле шәхес.
Татарстан Республикасы Фәннәр академиясенең Мәрҗәни исемендәге Тарих институтында Мидхәт Мөхәррәмовның тууына 100 ел тулуга багышланган тантаналы чара узды. Мидхәт Мөхәррәмовның тууына 100 ел тулуга багышланган чараны институт директоры Радик Салихов башлап җибәрде. Киңәйтелгән утырыш буларак үткәрелсә дә анда катнашучылар Мидхәт Мөхәррәмов белән бәйле истәлекләрен уртаклашты. Сугышта катнашып күрсәткән батырлыклары гына да фронтовик галимгә баш иеп рәхмәт әйтерлек.
Утырышта төп докладны Яңа тарих бүлегенең әйдәп баручы фәнни хезмәткәре Әлфия Галләмова ясады. Чыгыш ясаучылар билгеләп үткәнчә, Мидхәт Мөхәррәмов тоталитар системаның катгый кысалары шартларында эшләгән һәм фән белән шөгыльләнгән галим. Шуңа да карамастан ул үз сүзен ишеттерә белгән, алар фәнни хезмәтләр буларак иң төп саналган Наука нәшриятында басылып чыккан. Мидхәт Мөхәррәмовның Милли-Дәүләт төзелеше проблемалары буенча төп тикшеренүчеләрнең берсе булуы, Мулланур Вахитов, Якуб Чанышев кебек шәхесләребезне халыкка кайтаруда беренче адым ясавы, шулай ук гарәп имлясында басылган татар газет журналларын чыганак буларак өйрәнүе дә аерым билгеләп үтелде.
Киңәйтелгән утырышта Мидхәт Мөхәррәмов эшен дәвам итүче яңа буын һәм аның белән бергә, бер чорда эшләгән галимнәр катнашты. Алар барысы да бүгенге көндә республикабызның әйдәп баручы фән эшлеклеләре. Юбилей уңаеннан үткәрелгән искә алу чарасында катнашучыларга Мидхәт Мөхәррәмов истәлегенә багышлап чыгарылган китап бүләк ителде. Әлеге җыентыкны 2012 елда тел , әдәбият һәм сәнгатҗинтитуты хезмәткәрләр ебелән бергә гаиләсе туплап бастырган. Галимнең гыйльми эшчәнлеге үз гаиләсендә дә буыннан буынга дәвам итә. Әлеге утырышны үткәрүгә улы Наил белән килене Ләйсән зур ярдәм итте дип билгеләп үтте оештыручылар.
Мидхәт Мөхәррәмов берүзе җитәкләгән фән учагыннан хәзерге вакытта 4 төрле мөстәкыйль институт аерылып чыкты. Бу үзе генә дә Мидхәт Мөхәррәмовның оста җитәкче һәм зур галим булуын исбатлый.
Мөршидә Җиһан , Ирек Хәмидуллин. Татарстан яңалыклары
