Хәерле көн, мөхтәрәм телевизор караучылар! Караңгы көзләргә кергәндә татар матбугатуын укуыбызны дәвам итәбез.
Иң элек газеталар турында. Өлешчә мобилизацияләнгәннәрне озату мизгелләре әле дә кайтаваз булып килеп чыга. “Шәhри Казан” газетасы бу теманы беренче битенә чыгарып биргән. Чөнки 721 ир-егет төялгән эшелонны озатканнан соң, Татарстанда өлешчә мобилизацияләүнең чираттагы дулкыны килеп җитте-ил буенча тагын тагын 40 мең хәрби тупларга кирәк икән. Районнардан ир-егетләрне җыя башлаганнар инде.
Әлеге хәбәр янәшәсендә Федерация Советындагы бер депутат авызыннан, Россиядә армия хезмәтен тагын бер елга озайтып, элеккегечә ике ел итәргә дип әйттерделәр. Шундый чакта утка крәчин сибүне хәтерләткән бу хәбәрне халык ничек йоткандыр- анысы нә мәгълүм. Тәкъдим итүче депутатның үз баласы армиядә булдымы икән- әлегә мәгълүмат юк. Аның каравы урыннардан түрәләрнең hәм туганнарының үз балалары мобилизацияләнми, ә гади халыкнының сыпырып кына алалар дигән моң-зарлар Татарстан Дәүләт Советы депутатларына да килеп ирешкән инде. Кемнең кулында-шуның авызында дип юкка гына әйтмәгәндер безнең халык.
Илләр, кыйтгалар арасындагы мөнәсәбәтләр, рухи кыйммәтләр күз алдында җимерелеп яткан заманда бөтен авырлык гаилә җилкәсенә төшә. Шунлыктандыр инде, “Ватаным Татарстан” газетасы әлеге теманы беренче битенә чыгарып биргән. Газета журналисты “Гаилә кору өчен нәрсә комачаулый?” дигән сорауга төрле яктан килеп җавап эзләгән. Яратырга hәм телеңне тыярга дигән булырлар иде бу сорауга безнең әби-бабайлар.
Без монда дөнья проблемалары турында сүз озайтып ятканда, Әгерҗе районындагы Яңа Бәзәкә халкы бүгенгәчә юлсызлыктан иза чигә. Газета хәбәрчесе шул зар эзеннән районга барып кайткан. Мондый тормыштан соң шөкер иткәнеңне сизми дә каласың.
