Хәерле көн, мөхтәрәм җәмәгать! Дөнья хәлләрен татар матбугаты безгә ничек итеп җиткерә? Бүген дә шул сорауга җавап биреп карыйк.
Россия президенты 30 октябрьдән алып 7 ноябрьгә кадәр эшләми торган атна игълан иткән иде. Эшләми торган икән, димәк, ял итә торган, дип кабул итәргә өйрәнгән безнең ил халкы. Озак та үтми шунысы мәгълүм булды- чыгарга рөхсәт ителгән чит илләргә юлламаларны тиз арада алып бетергәннәр. Бәяләрен дә кыйммәтсенеп тормаганнар. Бу хәлләргә гаҗәпсенгән “Шәхри Казан” газетасы беренче битенә СОС биргән-Бәйрәм итәр чак түгел!
Бәйрәм рухын сүрелдерү өчендер инде-газета төре килеш кабергә төшеп ятучылар турында тулы бер бит язма бастырган. Хәтерлисездер, бер блогер ханым төн уртасында бер сәгать кабердә яткан кешеләр арасында зур бүләк уйнатабыз дип шундый ук зур тавыш чыгарган иде. Үлем килгәнен көтеп тормыйча гына кабердә ике кеше ятып чыккан икән инде, тагын икесе моңа әзер ди. Шөкер, акыл аеклыгын югалтып ук бетермәгәнбез икән әле.
Сүз уңаеннан шунысын да әйтергә кирәктер- теге блогер ханымга карата прокуратура тикшерү эше башлаган. Үлемне уенга әверелдерергә теләгән кеше өчен прокуратура нәрсә инде ул)
Пандемия чорында күп кенә компанияләрнең хәле мөшкелләнсә дә, машина сатучы салоннар, киресенчә, череп баеганнар hәм әле алга таба да рәхәттә яшәүләрен дәвам итәрләр кебек, дип яза “Татарстан яшьләре” газетасы. Кайбер мәгълүматларга ышансаң, илнең 50 эре автосалоны быелның беренче яртысында гына да 1 триллион 200 миллион сумлык машина саткан. Бу былтырның шул чорыннан 2,5 тапкырга күбрәк. Баксаң, башта короновирус дип аптырашта калган халык, кишер-чөгендергә бәя үскәнне күреп, машина алып калырга дип автосалонга йөгергән икән. Кыскасы, аңламассың бу дөньяны.
Шул ук “Татарстан яшьләре”ндә бик абруйлы укытучы-академик,педагогия фәннәре докторы, профессор,Россиянең халык мәгарифе отличнигы Җәүдә Хөсәенов бик аңлаешлы итеп “Мылтыксыз мәктәп нинди була?” дигән сорауга аңлатма биргән. Абруйлы шәхеснең сүзләренә хакимият чиновниклары да колак салса иде дип телик.
Үткән атнада Татарстан Дәүләт Советының Россия Дәүләт думасының төбәк җитәкчеләрен президент дип атаудан тыя торган законын кире кагуы илдә шулай ук шау-шу чыгарган иде. Бу Россия президенты Владимир Путинның ап-ачык итеп: ”Мы с уважением относимся к любому выбору народа Татарстана. Поэтому вы сами там решайте, ладно?” дигән сүзләреннән соң . Әлеге проблемага ачыклыкны “Ватаным Татарстан” газетасында Дәүлә Советы депутаты,Татарстанның халык шагыйре Ркаил Зәйдулла керткән. Тәфсилле җавап Татарстан халкының рухына тулысынча туры килә дип уйларга кирәк.
“Ватаным Татарстан” газетасындагы тагын бер бик кызыклы язма “Космоста да яшәрбез әле” дип исемләнгән. Бу көтелмәгән фикерне Казанга зур планнар белән АКШтан кайткан космик ракеталар төзүче милләтәшебез Надир Баhавиев әйткән. Фәнни мәкаләләрен татарча язучы бу милләтпәрвәр шәхесебезнең кем икәнлеген тәгаенләү өчен аның Мәсхүдә ханым Шәмсетдинованың улы икәнлеген әйтү дә җитәдер. Әйе, татарга гел үлем турында гына түгел, ә алда торган зур киләчәк турында да уйларга ярыйдыр, дигән фикер белән бүгенгә сезнең белән саубуллашам. Исәнлектә күрешик!
