Мамадышта республика спорт министрлыгы коллегиясенең күчмә утырышы узды. 2018 елда Мамадышта спорт-адаптация мәктәбе ачылган иде. Инвалид һәм үсеш ягыннан үзенчәлекле балалар белән махсус әзерлекле белгечләр шөгыльләнә.
Биредә тәрбияләнүче 7 бала Россия җыелма командасы составына кертелгән, алар 2022 елда Бөтендөнья кышкы махсус Олимпиада уеннарында катнаша. Утырышта республикада адаптив спортның торышы һәм үсеш перспективалары турында спорт министрлыгы белгечләре, Дәүләт Советы депутатлары, хакимият вәкилләре фикер алышты. “Жизнь без границ” проекты авторлары Татарстан Президенты ярдәмендә республика спорт-адаптация мәктәбе һәм филиалларының алтынчы ел инде уңышлы эшләвен билгеләп үттеләр. Аларда 26 тренер эшли, 250дән артык бала шөгыльләнә.
