Татар халкы тикмәгә генә, тел белгән- ил гизгән дип әйтми. Әйтик, Мамадыш районының “Миләшкәй” балалар бакчасында, сабыйлар әкиятләрне өч телдә: рус, татар, инглиз телләрендә сөйлиләр. Без дә дәресләреннең берсендә булып, балалар белән аралашып кайттык.
Соңгы өч ел дәвамында, Мамадыш районында барлык балалар бакчаларында сабыйларны инглиз теленә өйрәтәләр. Дәресләр бердәм программа буенча өлкән һәм әзерлек төркемнәрендә атнага 2 тапкыр үткәрелә.Әлеге башлангыч, район башлыгы инициативасы белән башланган.
Балалар һәм яшүсмерләр йорты директоры Артур Ефимов: «Бездә 4 өстәмә белем бирү педагогы эшли. Балалвр һәм яшүсмерләр йортында яшь, шулай ук тәҗрибәле белогечләр заманча программалар буенча укыталар.»
Бакчаларда балалар һәм яшүсмерләр йортыннан 4 өстәмә белем бирү педагогы эшли. Якынча 600 сабыйның бушлай чит тел өйрәнү мөмкинлеге бар.
“Миләшкәй” балалар бакчасында инглиз телен өстәмә белем бирү педагогы Гүзәлия Зиннәтова алып бара. Барысы да уен формасында уза.
Балалар үзләре белем бирү процессында зур кызыксыну белән катнашалар. Укытучының сорауларына өч телдә: рус, татар һәм инглиз телләрендә җавап бирәләр.
Биредә балаларга белемнең база өлешен бирәләр. Соныннан мәктәптә Инглиз телен өйрәнү күпкә җиңелрәк булачак. Ә тел белән тирәнрәк шөгыльләнергә теләүчеләр өчен өстәмә мөмкинлекләр бар. «Квантум» яшьләр үзәгендә махсус түгәрәк эшли, шул исәптән мәктәпкәчә яшьтәге балалар өчен дә.
