Гыйлем алырга беркайчан да соң түгел! Мамадыш мәдрәсәсендә яңа уку елы башланды. Биредә кичке һәм читтән торып уку бүлекләре, әзерлек курсы һәм берничә түгәрәк эшли. Алар төрле яшь категориясенә исәпләнгән. Бу хакта тулырак – киләсе сюжетта.
Фирдәүсә Җиһаншина Мамадыш мәдрәсәсенең 3нче курс студенты. Кичке уку бүлегендә белем ала. Бирегә алар атнаның 3 көнендә килеп, гыйлем үзләштерәләр.
Читтән торып, кичке уку бүлекләрен һәм әзерлек курсларын да кертеп, бүгенге көндә Мамадыш мәдрәсәсендә 150 шәкерт исәпләнә. Уку йортының тагын бер студенты Маннур Хәсәнов сүзләренчә, мондый учреждениеләр республика районнарында бармак белән генә санарлык. “Тудырылган мөмкинлекнең кадерен белергә кирәк”, — дип исәпли ул.
Әзерлек курслары ике елга исәпләнгән һәм алар атнаның ике көнендә уза. Бу киләчәктә мәдрәсәдә белем алырга теләүчеләр өчен оештырыла. Әлеге курсларда ислам дине буенча башлангыч гыйлемне бирәләр. Читтән торып һәм кичке уку бүлекләре дүртәр елга исәпләнгән. Беренчесе мәдрәсәдә көзге һәм кышкы каникуллар чорында уза, ә кичке уку бүлегенә көннең кайсы вакытында килергә икәнен шәкерт үзе хәл итә ала.
Мәдрәсәдә 9 мөгаллим эшли. Аларның дүртесе элегрәк шушы уку йортын тәмамлаган белгечләр.
Шәкертләрнең күпчелеге шәһәрдә һәм Мамадыш совхозы бистәсендә яшәүчеләр. Шулай ук Арташ, Иске Комазан, Шүләңгер авылларыннан килеп укучылар да бар.
