Махсус хәрби операция игълан ителгән көннән алып зәйлеләр зур тырышлык күрсәтә. Кемдер токмач кисә, икенчеләр җылылык мичләре, окоп шәмнәре әзерли. Ә менә маскировкалау челтәрен үрүчеләр һәр авыл җирлегендә, шәһәр үзәгендә, Иске Зәйдә дә бар. Бистәдәге челтәр үрү цехы эшчәнлеге белән без дә танышып кайттык.
Хәрби җырлар суза-суза әби-апалар маскировка челтәре үрә. Бу – Иске Зәйдәге хәрбиләр өчен челтәр әзерләү цехы. Декабрьдә изге күңелле волонтерлар төркеменә бер ел була. Шул вакыт эчендә 185 челтәр ясап, хәрбиләрне саклау өчен зур тырышлык куела.
Илдә махсус хәрби операция барганда, күпләр тыныч кына өйләрендә утыра алмый. Үзебездән бераз булса да өлеш кертергә тырышабыз, диләр. Челтәр үрергә килүчеләрнең күбесе 60тан узган хатын-кызлар. Иң олысына 85 яшь. Гөлүсә Сафина иртәнге сәгатьләрдән кичкә кадәр челтәр үрә. Кияве дә хәрби операция зонасына киткәч, бәйрәм көн, ял дими, аның һәр көне биредә уза.
Кисәләр, үрәләр, әзерлиләр. Әле тагын оста куллы апалар госпитальдәге егетләр өчен меңнән артык эчке кием тегеп озатканнар.
Маскировка челтәре күп әйберләрдән каплап, гомерләрен саклап кала. Егетләрдән килгән рәхмәт сүзләре волонтерларны тагын да рухланып эшләргә этәргеч бирә.
Әдилә Борһанова, Максим Майоров, Татарстан яңалыклары, Зәй районы
