Чара милләтебезнең рухи, мәдәни кыйммәтләрен саклау, үстерүне, бәйрәмнәрне халкыбызга кайтаруны, шәхси хуҗалыкларда кош-корт асрауны арттыруны күздә тота. Быел фестивальдә катнашырга 471 кеше гариза җибәргән, шулардан 33 җиңүче сайлап алынды.Каз өмәсе бәйрәменнән- безнең алдагы язма.
Җир өстенә беренче кар катламы яту белән татар авылларында иң матур йолаларның берсе — каз өмәләре үткәрелә. Татарстанда иң күп каз асраучы даны булган Мөслим районы, бөтендөнья татар конгрессы белән берлектә, 3 нче тапкыр каз өмәсе оештырды. Башкортостан, Удмуртия, Чувашия, Киров, Свердловск, Себер якларыннан ерак араны якын итеп милләттәшләребез бәйрәм йоласына җыелды. Россиякүләм каз өмәсе нинди мизгелләре белән истә калды икән соң? Шул хакта хәбәрчебез Миләүшә Гыйльфанова язмасында.
Мөслим районында казлар миллионлап үрчетелә. Ык елгасының шифалы суларында йөзеп үскән кош итенең тәме дә үзгә. Бирегә күрше-тирә районнардан гына түгел, башка төбәкләрдән дә каз алырга киләләр.Фестиваль Мөслим районы имам-мөхтәсибе Илгиз хәзрәт Сөнгатуллин догасы белән башланып китте. Һәр йортта диярлек каз үрчетелгәнгә күрә Мөслим халкының каз турында белмәгәне юк. Эльмира ханым каз маеннан дәвалы кремнар җитештерү белән шөгыльләнә. Биткә, чәчкә, тәнгә сөрткәндә каз маеның файдалы үзлекләре санап бетергесез, ди ул.
Каз өмәсе – ул элек-электән кышка азык әзерләү генә түгел, авыл халкының дус-туганлыгын ныгыту чарасы да. Иң мөһиме – кешеләр барлык мәшәкатьләрен онытып, күмәк эшкә бирелә, бергә күңел ача.
Чувашия төбәгеннән килгән эшмәкәрләр казны күпләп үрчетү нечкәлекләренә төшендерде.
Кышкы сабантуй диерсең! Кунаклар өчен Россиякүләм каз өмәсендә 2 көнлек тыгыз программа эзерләнгән. Төрле остаханәләр, җыр-бию, каз маеннан мичтә пешкән коймаклар да чыжлап торды.
“Каз канаты ап-ак була, ир канаты ат була..” Кешеләр бу кош турында бихисап җырлар, уеннар уйлап чыгарган, казлары булган гаилә – бай саналган. Казның бер җире дә әрәм ителми. Башы,тәпиләре,канаты. Ә менә каз мамыгыннан ясалган мендәрдә йокласаң, йокың тагын да тәмлерәк була, диләр.
Кем генә юк монда: Иң оста чигүчеләр, каздан иң тәмле ризык пешерүчеләр. Каз өмәсе бәйгесендә җиңүчеләрнең һәр иҗат җимеше сокландыргыч.
Халкыбызның бай тарихлы гореф-гадәтләреннән берсе – каз өмәсе, быел да бердәмлек, муллык чарасы булып күңелгә кереп калды.
Миләүшә Гыйльфанова, Дамир Мөхәммәтханов, Татарстан яңалыклары.
