Мәскәү каласының Советлар Союзы Герое Муса Җәлил исемен йорткән татар мәктәбе 25 еллык юбилеен билгеләп үтте. Шул уңайдан укытучылар коллективына һәм укучыларга котлауларын Фәрид Мөхәммәтшин җиткерде. Татарстан халыклары Ассамблеясе җитәкчесе буларак ул тел укытуның дәрәҗәсен һәм сыйфатын югары бәяләде. Башкалыбыз Мәскәүдә булып узган тантанадан безнең репортаж.
Мәскәүнең Люблино микрорайонында урнашкан 1186нчы номерлы мәктәп — зур мегаполиста милли традицияләрне, мәдәниятне һәм телне саклап калу үрнәкләренең берсе. Мәктәпнең тарихы 25 ел элек татар теле дәресләреннән башланып китә. Ә бүген этномәдәни компонент үз эченә телне, халыкара олимпиадаларда катнашуны, этник вокалны, милли көрәшне ала.
Мәскәүнең яшь буын татар вәкилләре биредә белем генә түгел, патриотик тәрбия дә ала. Мәктәп Муса Җәлил исемен йөртә. Шуңа да, фронтовик шагыйрьнең кызы Чулпан Мусаевнаның бирегә килүе табигый. Ул батырларның исемнәре буыннардан -буыннарга тапшырылырга тиеш, дип белдерде.
Милли мәгарифкә керткән зур өлешләре өчен укытучы һәм өстәмә белем бирү педагогларына лаеклы бүләкләр һәм рәхмәт хатлары тапшырылды. Парламент рәисеннән аерым бүләк — Казан Кремле композициясе. Мәскәү каласының татар мәктәбендә республикабызның символы узган чараның матур хәтирәсе булып сакланыр.
Эльза Әхмәтҗанова, Дмитрий Второв, Эдуард Мөхаммәтянов, Татарстан яңалыклары, Мәскәү.
