16 ноябрьдә Камал театрының кече залында “ХУШ, АВЫЛЫМ” спектакле. Авторы һәм режиссеры — Айдар Җаббаров.
Испан болеросы белән Аргентина тангосы ничек яңгырый? Әрмән һәм грузин музыкасы безне нәрсә белән таң калдыра? Чардаш һәм рок-н-роллны кайда һәм ничек бииләр? Әлеге кызыклы музыкаль сорауларга җавапларны 16 ноябрьдә Габдулла Тукай исемендәге Татар дәүләт филармониясенең концерт залында тыңларга мөмкин. Концерт «Дөнья халыклары музыкасы» дип атала.
Татарстан Дәүләт камера хоры «Җырлый торган Татарстан» проекты белән республика районнарына гастрольләргә чыга. Ул яшьләр аудиториясенә юнәлтелгән, яшьләр мәнфәгатьләрен исәпкә ала. Концертларны «Пушкин картасы» буенча карарга була.
Концерт программасына татар халык музыкасының иң яхшы үрнәкләре, уникаль автор аранжировкалары, дөнья классикасы үрнәкләре кергән.
17, 18 ноябрь көннәрендә Сабир Өметбаев исемендәге Минзәлә татар дәүләт драма театрының 85 еллыгына багышланган тантаналы кичә була.
18 ноябрьдә Казан Кремлендәге «Хәзинә» милли сәнгать галереясендә Татарстан Республикасы Рәссамнар берлегенең 85 еллыгы уңаеннан «Яңалыклар һәм традицияләр» дигән күргәзмә ачыла.
19 ноябрьдә Чүпрәле районы мәдәният йортында Буа татар дәүләт драма театры Искәндәр Сираҗи әсәре буенча сәхнәләштергән “Тәүбә” спектаклен күрсәтә.
«Тәүбә» спектакле – тәүбәгә килү, гафу итү һәм өмет турында. Монда сүз намус, абруй, шәфкатьлелек кебек төшенчәләр турында бара. Бу, барыннан да элек, хәзерге заман, кешеләр турында. Әсәр безнең ата-бабаларыбыз кичергән вакыйгалар белән бергә үрелеп бара.
20 ноябрьдә «Әкият»Татар дәүләт курчак театрында «Әлфия» дигән спектакль. Әсәрне сәхнәгә Илгиз Зәйниев куйган. Ул мәшһүр җырчы Әлфия Авзалованың иҗатына багышланган.
20 ноябрьдә Салих Сәйдәшев исемендәге зур концерт залында София Гобәйдуллина исемендәге “CONCORDIA» 11 халыкара заманча музыка фестивале уза.
Бүгенгә менә шулар. Мәдәниятле халык – бай халык. Мәдәният, сәнгать казанышларын , гореф-гадәтләр, йолаларны яхшырак белим дисәгез, театр, концерт, күргәзмә залларына рәхим итегез!
