Кышкы йөзүне яратучылар сезонны ачты. Әлмәттә моржлар «Айсберг» чыныгу клубына йөри. Үзәкнең ачылуына ярты гасыр вакыт үткән. Клуб әгьзалары белән хәбәрчебез дә очрашты.
Әлмәт моржлары бозда бәке тишәләр. Кышкы суда коену урынын әзерлиләр.
Ринат Ямалиев -бозлы суны яратучыларның берсе. Ул 6 ел сәламәт яшәү рәвешен алып бара ,башкаларны да артыннан ияртә. Үзе начар гадәтле кешеләрне тернәкләндерү үзәгендә эшли. Беренче тапкыр бозлы суга дуслары белән бергә чумган.
«Айсберг» үзәге әгъзасы Ринат Ямалиев: «Элегрәк салкын тиеп, грипп белән чирли идем. Су коена башлагач, инде бишенче ел авырганым юк. Температураның да күтәрелгәне булмады. Су коенгач уңай хис-кичерешләр барлыкка килә, үземне яхшырак тоям.»
«Айсберг» кышкы йөзү үзәгендә уза. Клубның иң яшь моржларының берсе -Давидка 15 яшь кенә әле.
«Айсберг » үзәге әгъзасы Давид Артюхин: «бер ел элек әни мине коенырга чакырды, миңа ошады – башта су салкын иде, әкренләп чыныктым. Миңа ошый, хәзер кышын күп тапкырлар коенам.»
Клубка ярты гасыр элек Михаил Землянов нигез салган. Энтузиастлар байтак җыелган. Тора-бара клубның үз бинасын да төзегәннәр. 2011 елда клуб Татарстанның кышкы йөзү федерациясе составына кертелә.
«Айсберг » үзәге рәисе Валерий Мальцев: «Безнең үзәк республикадагы иң популяр клуб. Бинабыз яхшы, шартлар җитәрлек. Әлмәттә кышкы суда коенырга яратучылар байтак.»
Үзәк коенырга яратучыларны берләштергән. Даими рәвештә анда йөздән артык кеше йөри. Алар өчен барлык шартлар тудырылган – киенү-чишенү бүлмәләре, тренажер заллары, сауна бар. Моржлар кайвакыт үз ярышларын да үткәрә. Ял көннәрендә шунда җыелып, су коенып, көч-күәт алып таралышалар.
Рената Сәетгәрәева, Тимур Туманов, Татарстан Яңалыклары, Әлмәт.
