Москит сеткасы баланың үлеменә сәбәпче булган. Әлмәттә 3 яшьлек кыз 9нчы этаждан егылган. Ә Түбән Камада кыз 5нче этаждан егылып исән калган. Ул да москит сеткасына таянып егылып төшкән. Тулырак алдагы язмада.
Әлмәттәге торак йорт янына берничә көн инде кешеләр кайгы уртаклашырга килә-биредә өч яшьлек баланың гомере өзелә.
Социаль челтәрләрдәге бу кадрларда-ата-аналар елый, фаҗига урынын полиция хезмәткәрләре чолгап алган. Янәшдә генә москит сеткасы, нәкь менә ул фаҗиганың сәбәпчесе. Сабый 9 нчы каттан егылып төшкән.
Москит сеткасы Түбән Камада да һәлакәтнең сәбәбе булды. Биредә бер кыз бишенче каттан егылып төшкән. Могҗиза белән исән калган — хәзер ул тернәкләнү бүлегендә.
Бүлмәне җилләтү теләге ел саен Россиядә йөзләгән гаиләгә фаҗига китерә. Балаларны караучысыз калдыралар. Тәрәзәләргә менәләр. Москит сеткасы гына ышанычлы сакчы түгел.
Тәрәзәләргә ныграк саклагыч җиһазларын куярга кирәк. Хәзер алар дистәләгән төрдә сатуда бар. Иң гадиләре-йөз сумнан башлап.
Сәүдә челтәренең Казан филиалы директоры Айрат Вәлихәммәтов: «балалар иминлеге хәзер ГОСТ таләпләрендә дә язылган, һәр тәрәзәгә саклагыч йозаклар урнаштыру каралган. Шуңа күрә безнең белгечләр һәр тәрәзә фурнитурасын сатып алганда, балалар иминле турында да искәртәләр.»
Бала иминлеге турында тәрәзә фурнитурасын сатучылар гына түгел, ата-аналар да уйлансын иде.
Айнур Вәлиәхмәтов, Дамир Мөхәммәтханов, Татарстан яңалыклары.
