Казанда Әлфия Авзалова исемендәге 3 нче халыкара фестиваль конкурсының 2 нче туры булып узды. Тулырак хәбәрчебез язмасында.
Татар халкының бөек җырчысы Әлфия Авзалова исемендәге халыкара фестиваль конкурсы быел 3 нче тапкыр үткәрелә. Катнашырга теләк белдереп, 400 гариза килгән булган, икенче турга 12 яштән 35 яшкә кадәрге 120 җырчы, 6 ансамбль, 8 бию ансамбле, 2 дуэт һәм нәфис сүз осталары үткән.
Әлфия Авзалованың кызы Зөлфия Авзалова, чараның төп максаты – сәләтле яшьләрне табу, милли традицияләрне саклау, дип билгеләде.
Фестивальнең жюри рәисе, Россиянең атказанган артисты, Татарстанның халык артисты Салават Фәтхетдинов чарага үзе килә алмаган, видео-котлау җибәргән. Жюри әгъзалары арасында Татарстанның халык артисты Нәфкат Нигъмәтуллин, җырчы Илгиз Шәйхразыев, Татарстан Республикасы атказанган сәнгать эшлеклесе, камера хоры җитәкчесе һәм дирижеры Миләүшә Тәминдарова, һәм башка талант ияләре булды.
Моннан алда үткәрелгән фестиваль җиңүчеләре атказанган артист исеменә лаек булдылар, Америкага барып кайттылар.
Фестиваль-конкурсның лауреатлары 23 октябрь көнне Әлфия Авзалованың тууына 90 ел тулуы уңаена багышланган Гала-концертта катнашачак.
Миләүшә Гыйльфанова, Ренат Сәхибгәрәев, Татарстан яңалыклары.
