Лаеш районында Яшь сугышчы курсын узарга мөмкин. «Сталкер» балалар хәрби-спорт лагерендә Казанның Борис Кузнецов исемендәге кадет интернат-мәктәбе укучыларының күрсәтмә чыгышлары узды. Программада — мавыктыргыч Аҗаган, командалар арасындагы уеннар һәм осталык дәресләре бар иде.Тулырак киләсе язмада.
Кыр өстен төтен баскан, коралдан аткан яки граната шартлаган тавышлар ишетелә. Бу Голливуд боевигы кадрлары түгел, ә кадетлар өйрәнүләре. Марат Сафин төз итеп атырга тырыша.
Марат Сафин: » Төз итеп ату өчен тренировкалар үтәргә, күп шөгыльләнергә кирәк. Аннары, атканда тыныч булу мөһим, кабалансаң, ашыксаң, максатыңа ирешә алмыйсың.»
Яшь саперлар өчен барысы да бик җитди. Мина эзләп табып, зарарсызландырырга кирәк. Дөрес, аны табу җиңел түгел, диләр кадетлар. Моның өчен җир өстеннән махсус күрсәткеч ярдәмендә игьтибар белән тикшереп узарга кирәк.
Камил Вәлиуллин: » Сапер салкын канлы, сабыр һәм акыллы булырга тиеш. Иң мөһиме-математиканы белү. Чөнки сапер бер тапкыр гына ялгыша ала.»
Булачак разведчиклар һәм десантчылар быел бергә шөгыльләнәләр-марш-бросоклар ясыйлар, сафта төз йөрү, көч күнегүләре, кул сугышы белән шөгыльләнәләр. Дәрес программасына туризм, тактик әзерлек, автоматны сүтү-җыю да керә. Нәтиҗәләр яхшы булсын өчен, кадетларга Росгвардия сугышчылары булыша.
Арслан Абдуллин: « без көн саен иртән 3-4 километр йөгерәбез, шулай ук тартылабыз, пресс ясыйбыз.Үзеңне тонуста тотарга кирәк. Ә бу киләчәктә безгә хәрби һөнәрләрне яхшы итеп үзләштерергә мөмкинлек бирәчәк.»
Лагерьда йөздән артык бала. Аларның һәр икенчесе — укырга керүче кадетлар. Быел лагерьда беренче көннәрдән үк аларга үзләрен чын хәрби итеп тою мөмкинлеге бирелгән — атуда күнегүләр ясарга һәм яшь сугышчы курсын үзләштерергә рөхсәт иткәннәр.
Казан кадет интернат-мәктәбенең «Яшь десантчы» хәрби-патриотик клубы җитәкчесе Тәлгать Камалиев: « табигый сайлап алуны уздырабыз. Балаларга сайлап алу мөмкинлеге бирелә, киләчәктә аларга хәрби хезмәт кирәкме-юкмы – шуны билгелибез. Сафта йөрү, физик күнегүләргә кайберәүләр түзми, өйләренә кайтып китәләр.»
Киләсе елда лагерьда укыту программасына кул сугышы һәм кыр шартларында исән калу нигезләрен дә кертергә планлаштыралар.
Ралина Абрамова, Сергей Павлухин, Татарстан яңалыклары, Лаеш районы.
