Лаеш районында “Балык булсын!” дигән экологик акция үтте. Елгада боз астындагы суга кислород үтеп керсен өчен бәкеләр тиштеләр. Кыш айларында су саеккач, әлеге чара балыкларга бик тә мөһим. Акциягә Советлар Союзы Герое Борис Кузнецов та кушылды. Биоресурслар буенча дәүләт комитеты белгечләре балыкларны коткарып калу өчен боз өстендә эшне киң җәелдергәннәр. Бозны төрле урында бораулап, бәкеләр ясыйлар.
Бәкедә су кабат туңмасын өчен, аларга камыш тутыралар. Бу суга кислород үтеп керергә булыша, ә боз астындагы тереклек дөньясына исән калу өчен өчен бу бик тә кирәк.
ТР Биологик ресурслар Дәүләт Комиетының бүлек җитәкчесе Ирина Мөстәкыймова: «Елганың әлеге тамагында территороия зур, балык тоту тыелган, бәке ясаучылар юк. Без бозны бораулап, бәкеләр ясыйбыз, ясалма ысул белән булса да балыкларны коткарып калырга тырышабыз.»
Бозны бер полоса буйлап тишеп, бәкеләр ясыйлар. Белегчеләргә гимназия укучылары да булыша.
Бөек Ватан сугышы ветераны, Советлар Союзы Герое Борис Кузнецов: «Сугыш вакытында да шулай эшләдек, ул чакта да балык тотучылар булды, хәзер техника башка, көчле. Элек балык та күбрәк иде, балык җиңел тотылды.»
Шундый чаралар җәен күп балык тотарга мөмкинлек бирәчәк. Елга тамагында 200дән артык бәке тиштеләр, аларга камышлар салдылар. Белгечләр фикеренчә, бу чара суны кислород белән баетырга җитәчәк.
Айнур Валиахметов, Ленар Хәбибуллин.
