Байлар Сабасының “Бәләкәч” балалар бакчасында “Ел тәрбиячесе 2024 ” республика бәйгесенең зона туры булып узды. Жюри һәм хезмәттәшләре каршында Саба, Арча, Балтач, Әтнә районнарыннан 12 тәрбияче үз осталыгын күрсәтте.
“Ел тәрбиячесе” конкурсы иң яхшы тәрбиячеләрнең эш алымнары белән уртаклашу, сәләтлеләрне ачыклау максатыннан үткәрелә. Бәйгедә катнашучыларны “Бәләкәч” балалар бакчасына йөрүче нәниләр сәламләде. Татарстан Республикасы мәгариф министрлыгы консультанты Татьяна Сидорова , район мәгариф бүлеге белгечләре чыгышыннан соң җирәбә салынды.
Беренче этапта тәрбиячеләр балалар белән шөгыль үткәрделәр. Иң беренче булып чыгыш ясау бәхете Бала үсеше үзәге – Арча шәһәренең 4 нче балалар бакчасының музыка җитәкчесе Раушания Закировага елмайды.
Тәрбиячеләр үзләренең эшчәнлекләрендәге алымнарны төрле кызыклы , мавыктыргыч , үтемле юнәлештә күрсәтеп бирә алдылар. Шәмәрдәннең “Салават күпере” балалар бакчасыннан Гөлнара Афанасьева һәм “Бәләкәч” балалар бакчасыннан Гөлүсә Әүбакирова чыгыш ясады. Ул балаларны уйнарга да , уйларга да мәҗбүр итте.
“Бәләкәч” балалар бакчасында “Ел тәрбиячесе” бәйгесен үткәрү өчен барлык шартлар да тудырылган. Бакча коллективының тырыш хезмәте һәр җирдә күренеп тора.
Йомгаклау этабында зона турларында иң күп балл җыйган 30 тәрбияче катнашачак.
Райлә Галәвина, Ирек Солтанов, Татарстан яңалыклары, Саба районы.
