Йогыш белән авыручылар саны да кимеми Бигрәк тә өлкән яшьтәге кешеләргә сак булырга кирәк. Ковид госпитальләрендә дә хәл җиңел түгел. Республика клиник хастаханәсенең кызыл зонасыннан хәбәрчебез репортажы.
Операция бүлмәсеннән ишетелгән газаплы сыкрау авазлары колакларны яра. Монда — иң авыр хәлдәге пациентлар. Үз аңнарында булучылар үзләре сулый. Ясалма сулыш алдыру аппаратлары да әзерләп куелган. 99 яшьлек әбине дә апппартака тоташтырганнар. Янәшәдәге 60 яшьтән өлкәнрәк хатын да бик авыр сулый.
Өлкән яшьтәге кешеләрнең байтагы бирегә авыр – яшәү белән үлем арасындагы хәлдә китерелә. Табиблар гомерләрен саклап калу өчен соңгы чиккә кадәр тырыша..
Медицина хезмәткәрләре бик авыр хәлдәге авыруларга аеруча игътибарлы. Аларга психолог та булырга туры килә. Чөнки өметсезлеккә бирелгән авыурулар еш очрый. Чираттагы пациент та өлкән яшьтә, аны авылдан китергәннәр. Бөтен гаилә әгъзалары прививка ясаткан, ә әби өлгерә алмаган. Чирләп киткән.
Әлфинур Жураева хастаханәдә ике атнадан артык дәваланган. Тиздән чыгарырга тиешләр. Әлегә күбрәк ятып торырга, саклану чараларын күрергә киңәш итәләр. Караватта ничек яту турында да инструкцияләр үткәрәләр. Берәр сәгать буена уң һәм сул якта, корсакта яки аркада ятып, алыштырып торырга кирәк. Үпкәгә, тын юлларына киеренкелек булмаска тиеш.
Рәфкать Шәфиев та хастаханәдә яткан көннәрен томанлы гына хәтерли. Аңа 72 яшь, прививка ясатмаган, йогыш эләкмәс дип дип ышанган. Хәзер өенә кайтырга әзерләнә, госпитальдәге бөтен авыртуны тизрәк онытырга тели.
Ковид йогышы бик хәтәр, тиз тарала. Кайчагында табиблар күпме генә тырышсаалар да, гомерләрне коткарып кала алмыйлар. Һәркем үз сәламәтлегенә игътибарлырак булсын, дистанцияне сакласын, барлык саклык чараларын да үтәсен иде, дип тели табиблар.
Алмаз Хәкимов, Владимир Юрков, Татарстан яңалыклары.
