Россиядә Covid-19 эпидемиясен тулысынча җиңәр өчен бары тик массакүләм вакцинация гына ярдәм итәчәк. Бу хакта Роспотребнадзорның матбугат хезмәте хәбәр итә.
Covid-19 сәламәтлек өчен куркынычлы, катлаулы инфекция, аның йогышы организм өчен начар төгәлләнергә мөмкин. Шуңа күрә инфекционистлар һәм эпидемиологлар бу эпидемияне бары тик вакцинация гына җиңә алачак дип саный. Шул ук вакытта коронавируска каршы вакцинаны җәен ясап өлгерергә кирәк. Бу көзге-кышкы сезонга әзерләнергә ярдәм итә, чөнки бу чорда салкын тиеп яки башка инфекцияләр белән авыру очраклары арта. Белгечләр әйтүенчә, «эпидемиядән һәм пандемиядән вакцинация генә түгел, ә кыска вакыт эчендә уздырыла торган массакүләм вакцинация ярдәм итә». Болай эшләгәндә, патогенга иммунитеты булган кешеләр күбәя, нәтиҗәдә вирус йоктыру «чылбыры» өзелә.
