Коронавирус белән хәл акрынлап җайга салына, шулай да һәркайда шәхси саклану чараларын куллану мәҗбүри булып кала. Битлекләр, перчаткалар, махсус костюмнар җитештерүне киметмәскә кирәк. Республикабыз предприятиеләре дә әлеге кирәкле эшкә алынды.
Бер минутта бер костюм. «Ростех» дәүләт корпорациясенә керүче «КазХимНИИ» предприятиесе вируска каршы костюмнар җитештерүгә алынган. Федераль компетенцияләр үзәге экспертлары ярдәме белән ай ярым эчендә сменага өч йөз уннан алып, алты йөз данәгә кадәр костюм тегәләр.
«КазХимНИИ » АҖ проект җитәкчесе СНХ Алексей Болотов : «Без һәр эш буенча вакытны тикшереп карадык. Һәр кешенең эшкә сәләтен, тизлеген чагыштырдык. Кем дә булса төрле сәбәпләр белән эшкә чыга алмаса, шунда үк үзгәреш кертәбез. Эшне бүләбез. Билгеләгән планнарны барыбер үтибез.»
Яңа проектка кадәр һәр хезмәткәр башыннан алып ахырына кадәр костюмны берүзе теккән. Хәзер тегү процессы вак операцияләргә, хезмәткәрләр арасында конвейер принцибы буенча бүленгән. Бу җитештерүне шактый тизләтергә мөмкинлек биргән.
Компетенцияләр федераль үзәге комплекслы дәүләт программасын үти, ул «Хезмәт җитештерүчәнлеге һәм эш белән тәэмин итүгә булышу» илкүләм проектына керә.
Татарстан Республикасы сәнәгать һәм сәүдә министры урынбасары Алмаз Хөсәенов:»Хезмәт җитештерүчәнлегенең илкүләм проекты мондый проектларны гамәлгә ашыруга юнәлтелгән, 2024 елга 350гә якын предприятие шушы режимга күчәргә тиеш, әлегә 80 предприятие генә аңа күчте. Проект бар җирдә дә гамәлгә ашырыла, идарә җитәкчеләре үз хезмәткәрләрен укыталар һәм процессны оптимальләштерәләр.»
Үзәк экспертлары коронавируска каршы продукция җитештерүчеләргә алга таба да ярдәм итәчәк. Проектка бөтен Россиядән 10000ләп предприятие җәлеп ителәчәк.
Александр Шмагин, Дамир Мөхәммәтханов.
