Илнең төп канунына төзәтмәләр кертүне яклап тавыш бирү 25 июньдә башланган иде. Сайлау участоклары көн саен иртәнге сигездән кичке сигезгә кадәр ачык. Ә конституциягә төзәтмәләр кертүгә тавыш бирүнең төп көне иртәгә 1-нче июль.
Иртәнге сәгать 8. Казан мәктәпләренең берсендә урнашкан сайлау участогы. Анда кергәнче — температураны мәҗбүри тикшерү. Пандемия шартларында сайлау комиссиясе әгъзаларына мәшакать артты. Ләкин шунсыз ярамый, барысы да тавыш бирүчеләрнең сәламәтлегенә саклау максатыннан эшләнә.
Сайлау участогы комиссиясе рәисе Рәмзия Шәрифиева: «Сайлау комиссиясендә эшләүчеләрнең һәркайсының температурасын үлчибез. Барысы да саклану чаралары белән тәэмин ителгән һәм аларны үтәргә тырышабыз.»
Сайлауга килүчеләрнең саклану чаралары булмаса участокта перчаткалар һәм битлекләр биреләчәк. Комиссия әгъзалары паспортларны тикшергәндә дә дистанцияне саклый.
